Samantha at Pawan Fans Charity Event

Nazriya Nazim Latest Cute Stills

Cute Henna Chopra Latest Stills

New Anushka Irandam Ulagam Movie Latest Stills In Hd

இயக்குநர் பாலசந்தருக்கு 'வாழ்நாள் சாதனையாளர்' விருது

தமிழ்த் திரையுலகின் பழம்பெரும் இயக்குநர் கே.பாலசந்தருக்கு 'வாழ்நாள் சாதனையாளர்' விருது                    வழங்கி கெளரவிக்க இருக்கிறார்கள்.

கே.பாலசந்தருக்கு 'வாழ்நாள் சாதனையாளர்' விருது வழங்கி கெளரவிக்க இருக்கிறது ரைன் டிராப்ஸ் அமைப்பு.

இது தொடர்பாக அந்த அமைப்பு வெளியிட்டுள்ள அறிக்கையில், “கடந்த பல ஆண்டுகளாக சினிமா உலகில் அளப்பரிய பங்களிப்பை ஆற்றிவரும் இயக்குநர் கே பாலசந்தருக்கு வாழ்நாள் சாதனையாளர் விருது வழங்கப்படுகிறது.

இவ்விருது வழங்கும் விழாவில் பிரபல இசை அமைப்பாளர் ஏ.ஆர்.ரஹ்மான், திரையிசைப் பாடகர் எஸ்.பி.பாலசுப்ரமணியம் மற்றும் பழம்பெரும் நடிகை மனோரமா ஆகியோருடன் தமிழ் நாட்டைச் சேர்ந்த கிரிக்கெட் வீரர்களான ஆர்.அஸ்வின், ஸ்ரீகாந்த் ஆகியோர் கலந்து கொள்ளவிருக்கிறார்கள்.

இந்நிகழ்ச்சியில் 'மாற்றம் ஆவோம்', ( 2014) என்ற ஆண்டிற்கான காலண்டர் உலக எய்ட்ஸ் தினத்தில் வெளியிடப்படுகிறது. இந்த காலண்டரில் சாதனையாளர்களை பற்றிய தகவல்களும் சிறந்த சமூக கருத்துகளும், எய்ட்ஸ் நோயால் பாதிக்கப்பட்ட குழந்தைகளுக்கு கல்வி நிதி குறித்த விவரங்களும் அடங்கியிருக்கும்” என்று கூறப்பட்டுள்ளது
.

பொடியனாக மாறும் ஜெய்

ஜெய் நடிக்கவிருக்கும் அடுத்த படத்திற்கு 'பொடியன்' என்று தலைப்பிட்டு இருக்கிறார்கள்.

'ராஜா ராணி' படத்தில் ஜெய்யின் நடிப்பிற்கு பிறகு, அவருக்கு பல்வேறு வாய்ப்புகள் குவிகிறது. 'திருமணம் என்கிற நிக்கா', 'நவீன சரஸ்வதி சபதம்' உள்ளிட்ட பல படங்களில் நடித்து வருகிறார் ஜெய்.

'உதயம் NH4' என்ற படத்தினை இயக்கிய மணிமாறன் தனது அடுத்த படத்தின் நாயகனாக ஜெய்யை ஒப்பந்தம் செய்திருக்கிறார். ஜனவரியில் இப்படத்தின் படப்பிடிப்பு தொடங்குகிறது.

படத்திற்கு 'பொடியன்' என்று தலைப்பிட்டு இருக்கிறார்கள். படத்தின் தலைப்பு குறித்து “சிறுவர்களைத் தான் பொடியன் என்று அழைப்பார்கள். ஆனால், இப்படத்தை பார்த்த பிறகு பொடியன் என்பதற்கான பொருளை அவர்கள் மாற்றிக் கொள்வார்கள். அதன் பிறகு சிறுவர்களை பொடியன் என்று யாரும் அழைக்க மாட்டார்கள்.” என்று இயக்குநர் மணிமாறன் தெரிவித்துள்ளார்.

அரசியல் பின்னணி கொண்ட கதைக்கு, 'பொடியன்' என்று தலைப்பிட்டு இருக்கிறார் மணிமாறன் என்பது குறிப்பிடத்தக்கது.

'கோலி சோடா' உருவான கதை!

'கோலி சோடா' படம் எப்படி உருவானது, நடிக்க நான்கு சிறுவர்களை எப்படி தேர்வு செய்தார், படத்திற்காக சிறுவர்களை எப்படி தேர்வு செய்தார் என்று விவரித்திருக்கிறார் இயக்குநர் விஜய் மில்டன்.

ப்ரியமுடன், ஆட்டோகிராப், காதல், வழக்கு எண் 18/9 படங்களின் ஒளிப்பதிவாளர் விஜய் மில்டன் இயக்கியிருக்கும் படம் ’கோலி சோடா’.

'கோலி சோடா' படம் குறித்து இயக்குநர் விஜய் மில்டனிடம் கேட்ட போது, “ஒரு காலை நேரத்தில் கோயம்பேடு மார்கெட் போயிருந்தேன். யத்தேச்சையா கடைகளுக்கு மேலே இருந்த பரணைப் பார்த்தேன். அதில் வரிசையாக நூத்துகணக்கான இளைஞர்கள் தூங்கிட்டு இருந்தாங்க. அந்த ஃப்ரேம் எனக்கு ஆயிரம் கதைகள் சொல்லுச்சு. அவங்க யாரு, என்னன்னு விசாரிச்சப்போ கிடைச்ச லைன் தான் “கோலி சோடா”.

அவங்களுக்கு இந்த மார்க்கெட்டை தாண்டி வேறு எதுவும் தெரியாது. அவங்களுக்குன்னு எந்த அடையாளமும் கிடையாது. வயசு ஆயிருச்சுனா வாழ்க்கை அவ்வளவுதான். வயசானாலும் மார்க்கெட்டை விட்டு போக மாட்டாங்க. கஞ்சா விக்கிறது, டீக்கடை போடுறதுன்னு அங்கேயேதான் சுத்தி வருவாங்க.

இப்படிப்பட்ட நாலு பசங்க, நம்ம வாழ்க்கையும் இப்படியே போயிடுமோ, நமக்கான அடையாளம் என்ன?னு யோசிக்கும் போது கதை ஆரம்பிக்குது. இதனால நம்ம அடையாளத்துக்கு ஏதாவது பிரச்சனை வந்துடுமோ?னு ஏற்கனவே அடையாளத்தோட இருக்கிற கடை முதலாளிங்க யோசிக்கும் போது பிரச்சனை ஆரம்பிக்குது. இப்படி ரெண்டு வெவ்வேற எண்ணங்களோட மோதல் தான் “கோலி சோடா”.

பசங்க படத்துல நடிச்ச பசங்க இப்ப வளர்ந்திருப்பாங்க. அவங்களையே நடிக்க வெச்சேன். அந்த நாலு போரையும் ஊர்ல இருந்து வரவழைச்சி டெஸ்ட் ஷூட் எடுத்தோம். சனி,ஞாயிறுகள்ல கோயம்பேடு மார்க்கெட்ல காலையில் இருந்து ஈவினிங் வரை சுத்த விட்டு அதையும் ஷூட் பண்ணினோம். மார்க்கெட்ல சுத்தின அழுக்கு, நாற்றம் அத்தனையும் அவங்களுக்கு அத்துப்படி ஆகிருச்சு. மூட்டை தூக்கி உடம்பு இருகிருமே! அதுக்காக ஷூட்டிங்கைத் தள்ளி வெச்சு நாலு பேரையும் ஜிம்முக்கு அனுப்பினோம். அரும்பு மீசைக்காக ஏகப்பட்ட ட்ரீட்மென்ட். நான் நினைச்ச மாதிரி அவங்க உருமாறி வந்த பின்னாடி தான் ஷூட்டிங்க்கு கிளம்பினோம்” என்று கூறினார்.

நடிகர் கிருஷ்ணாவிற்கு திருமணம்

நடிகர் கிருஷ்ணாவிற்கும் கோவையை சேர்ந்த கைவல்யாவுக்கும் திருமணம் நடைபெறவிருக்கிறது.

'கற்றது களவு', 'அலிபாபா', 'கழுகு' உள்ளிட்ட படங்களில் நடித்தவர் கிருஷ்ணா. இவர் பிரபல தயாரிப்பாளர் சேகரின் இரண்டாவது மகனும், முன்னணி இயக்குநர் விஷ்ணுவர்தனின் தம்பியும் ஆவார்.

தற்போது 'வானவராயன் வல்லவராயன்', 'விழித்திரு' போன்ற படங்களில் நடித்து வருகிறார். இவருக்கு திருமணம் முடிவாகியுள்ளது.

கிருஷ்ணாவுக்கும், கோவையைச் சேர்ந்த ரங்கநாதன் - வாசுகி தம்பதியரின் மகள் கைவல்யாவுக்கும் திருமணம் முடிவாகியிருக்கிறது. கைவல்யா சாப்ட்வேர் இன்ஜினியராக பணியாற்றி வருகிறார். இன்று கோவையில் திருமண நிச்சயத்தார்த்தம் நடைபெற இருக்கிறது.

2014 பிப்ரவரி 6ம் தேதி கோவையில் திருமணம் நடைபெற இருக்கிறது. திருமண வரவேற்பு சென்னையில் நடத்த திட்டமிட்டு இருக்கிறார்கள்.

மீண்டும் இணையும் சிம்பு - நயன்தாரா!

சிம்பு - பாண்டிராஜ் படத்திற்கு நயன்தாராவை நாயகியாக ஒப்பந்தம் செய்திருக்கிறார்கள்.

பாண்டிராஜ் இயக்கத்தில் சிம்பு நடித்துவரும் படத்திற்கு, நாயகியாக யாரையும் ஒப்பந்தம் செய்யாமல் படப்பிடிப்பு நடத்தி வந்தார்கள். விரைவில் நாயகி ஒப்பந்தம் செய்யப்படுவார் என்று அறிவித்தார்கள்.

சிம்பு - பாண்டிராஜ் படத்தினை, சிம்பு தயாரிக்க, அவரின் தம்பி குறளரசன் இசையமைத்து வருகிறார். பாலசுப்பிரமணியெம் ஒளிப்பதிவு செய்ய, ப்ரவீன் எடிட்டராக பணியாற்றி வருகிறார்.

இப்படத்தின் நாயகியாக தற்போது நயன்தாரா ஒப்பந்தம் செய்யப்பட்டு இருக்கிறார். படத்திற்கு இன்னும் பெயர் சூட்டப்படவில்லை.

'வல்லவன்' படப்பிடிப்பின் போது சிம்பு - நயன்தாரா இருவருமே காதலித்து வந்தார்கள். அதற்கு பிறகு கருத்து வேறுபாடு ஏற்பட்டு பிரிந்தார்கள். பின்னர் சிம்புவோ, “நயன்தாராவுடன் இணைந்து நடிப்பது பற்றி எனக்கு கவலையில்லை. கதைக்கு தேவைப்பட்டால் நடிப்பேன்” என்று பேட்டியளித்தார்.

இந்நிலையில், சிம்பு - நயன்தாரா இருவருமே மீண்டும் நண்பர்களானார்கள். தற்போது மீண்டும் சிம்பு - நயன்தாரா இருவரும் சேர்ந்து நடிக்க தீர்மானித்திருப்பது தமிழ் திரையுலகினரை ஆச்சர்யத்தில் ஆழ்த்தியிருக்கிறது.

சிம்பு படத்தின் நாயகியாக நயன்தாரா ஒப்பந்தம் செய்யப்பட்டு இருக்கிறார் என்ற தகவலை இயக்குநர் பாண்டிராஜ், தனது ட்விட்டர் தளத்தில் கூறியுள்ளார்.

1200 திரையரங்குகளில் 'இரண்டாம் உலகம்'

செல்வராகவன் இயக்கத்தில் வெளியாக இருக்கும் 'இரண்டாம் உலகம்' படத்திற்கு மிகப்பெரிய எதிர்பார்ப்பு நிலவி வருகிறது.

ஆர்யா, அனுஷ்கா நடிப்பில், செல்வராகவன் இயக்கத்தில் உருவாகியிருக்கும் படம் 'இரண்டாம் உலகம்'. ஹாரிஸ் ஜெயராஜ் இசையமைக்க, ராம்ஜி ஒளிப்பதிவு செய்திருக்கிறார். பி.வி.பி சினிமாஸ் இப்படத்தினை தயாரித்திருக்கிறது.

மது - ரம்யா ரெண்டு பேரும் இந்த பூமியில் அழகான காதலர்கள். அவர்கள் இருவரும் இன்னொரு உலகில் மருவன் - வர்ணா என்கிற பெயரில் இரண்டு பாத்திரங்களாக சந்திக்கிறார்கள். அவர்கள் எப்படி அந்த இரண்டு பாத்திரங்களாக சந்திக்கிறார்கள், அந்த உலகத்துக்கு எப்படி போனார்கள், அவர்களின் அனுபவம் எப்படி இருந்தது என்பதுதான் 'இரண்டாம் உலகம்' படத்தில் செல்வராகவன் சொல்லவரும் கதை.

ஆர்யா நடிப்பில், 'ராஜா ராணி', 'ஆரம்பம்' ஆகிய படங்களுக்குப் பிறகு, 'இரண்டாம் உலகம்' வெளிவர இருப்பதால் இப்படத்திற்கு முன்பு வெளியான ஆர்யா படங்களுக்கு இல்லாதளவிற்கு எதிர்பார்ப்பு கிடைத்திருக்கிறது.

நாயகி அனுஷ்கா என்பதால், தெலுங்கிலும் ஒரே சமயத்தில் 'வர்ணா' என்ற பெயரில் வெளியிட இருக்கிறார்கள்.

தமிழ், தெலுங்கு என இரண்டிலும் சேர்த்து சுமார் 1200 திரையரங்குகளில் இப்படம் வெளிவரவிருக்கிறது.

1200 தியேட்டர், மிகப்பெரிய எதிர்பார்ப்பு என்பதால் படக்குழு எப்படியும் இரண்டு வாரத்தில் கல்லா கட்டிவிடலாம் என்ற நம்பிக்கையில் இருக்கிறது.

திரையரங்க ஒப்பந்தத்தை தொடங்கியது 'ஜில்லா'

பொங்கல் ரேஸில் முதலாவதாக திரையரங்க ஒப்பந்தத்தை தொடங்கியது 'ஜில்லா'.

'கோச்சடையான்', 'வீரம்', 'ஜில்லா' ஆகிய படங்கள் பொங்கல் ரேஸில் களம் இறங்கியிருக்கின்றன. இம்மூன்று படங்களில், எதுவுமே பின்வாங்கப் போவதில்லை என்பது உறுதியாகியிருக்கிறது.

மூன்று படங்களில், முதலாவதாக பொங்கல் வெளியீடு என்று 'வீரம்' களம் இறங்கினாலும், படத்தின் விநியோக உரிமையை தொடங்கியது 'ஜில்லா' தான். 'ஜில்லா' படத்தின் விநியோக உரிமை அனைத்தும் முடிந்து, தற்போது திரையரங்க ஒப்பந்தத்தை தொடங்கிவிட்டார்கள். ஜனவரி 10ம் தேதி வெளியாகும் என்று கூறியிருக்கிறார்கள்.

'ஆரம்பம்' படத்தின் வசூலால், 'வீரம்' விநியோக உரிமை யாருக்கு என்பதில் கடும் போட்டி நிலவி வருகிறது. 'வீரம்', 'ஜில்லா' ஆகிய படங்கள் பொங்கல் வெளியீடு என்று போஸ்டர்கள் வெளியிட்டு வரும் வாரத்தில் விளம்பரப்படுத்தும் பணிகள் துவங்கும் என எதிர்பார்க்கப்படுகிறது.

'கோச்சடையான்' படத்தைப் பொறுத்தவரை ரஜினி பிறந்தநாளன்று வெளியாக இருக்கும் இசை மற்றும் டிரெய்லருக்குப் பிறகே விளம்பரப்படுத்தும் பணிகள் துவங்கும் எனத் தெரிகிறது.

அமிதாப்புடன் நடிக்கிறேன் : சந்தோஷ தனுஷ்!

பால்கி இயக்கத்தில் அமிதாப்புடன் இணைந்து நடிக்க இருப்பதை உறுதி செய்தார் தனுஷ்.

ஆனந்த் எல்.ராய் இயக்கத்தில், இந்தியில் தனுஷ் அறிமுகமான படம் 'ராஞ்ஹானா(Raanjhanaa)'. ஏ.ஆர்.ரஹ்மான் இசையில் வெளியான அப்படம் இந்தியில் தனுஷிற்கு ஏற்ற அறிமுகப் படமாக அமைந்தது.

அப்படத்தினைத் தொடர்ந்து இந்தியிலும் கவனம் செலுத்த ஆரம்பித்தார் தனுஷ். ஆனால் தனக்கு ஏற்றவாறு கதை வரும்வரை காத்திருந்தார்.

பால்கி இயக்கத்தில் அமிதாப் பச்சன், தனுஷ், அக்‌ஷரா ஹாசன் மூவரும் இணைந்து நடிக்கவிருப்பதாக செய்திகள் வெளியாகின. ஆனால், இச்செய்தி அதிகாரப்பூர்வமாக அறிவிக்கப்படாமல் இருந்தது.

இந்நிலையில், தனுஷ் தனது ட்விட்டர் தளத்தில் இச்செய்தியினை உறுதி செய்திருக்கிறார். "அமிதாப் பச்சனுடன் இணைந்து நடிக்கவிருப்பதை மிகவும் பெருமையாக கருதுகிறேன். இளையராஜா சார் இசை, பி.சி.ஸ்ரீராம் சார் ஒளிப்பதிவு செய்ய பால்கி இயக்கும் படத்தில் நடிக்க ஒப்பந்தமாகி இருக்கிறேன்.” என்று தனுஷ் கூறியுள்ளார். அக்‌ஷரா ஹாசன் நடிக்க இருக்கிறாரா என்பது குறித்து தனுஷ் எதுவும் தெரிவிக்கவில்லை.

'சீனி கம்','பா' என வரவேற்பைப் பெற்ற படங்களை இயக்கியவர் பால்கி. மேலும், இப்படத்தில் ஷாருக்கான் நடிக்க இருந்ததாகவும், அந்த வேடத்தில் இப்போது தனுஷ் ஒப்பந்தமாகி இருப்பதாகவும் செய்திகள் வெளியாகியுள்ளன.

நடிகை ஸ்ருதிஹாசன் மீது தாக்குதல்!

கமல்ஹாசன் மகள் ஸ்ருதிஹாசன் மீது மர்ம நபர் தாக்குதல் நடத்தியதால் பரபரப்பு ஏற்பட்டு இருக்கிறது.

கமல்ஹாசனின் மூத்த மகள் ஸ்ருதிஹாசன். தமிழ், தெலுங்கு, இந்தி என மூன்று மொழிகளிலும் பரபரப்பாக நடித்து வருகிறார். தற்போது 'வெல்கம் பேக்' என்ற இந்தி படத்திலும், 'ரேஸ் கெளரம்' என்ற தெலுங்கு படத்திலும் நடித்து வருகிறார்.

ஒரு நபர் கடந்த ஒரு வருடமாகவே, மும்பையில் ஸ்ருதிஹாசனை பின் தொடர்ந்து இருக்கிறார். 'ராமைய்யா வஸ்தாவய்யா' இந்தி படத்தின் படப்பிடிப்பிற்கு வந்த அந்த நபரை, படக்குழு விரட்டியிருக்கிறது.

நேற்று ஸ்ருதி மும்பையில், வீட்டில் இருந்தபோது, காலை 9:30 அளவில் காலிங் பெல் ஒலித்தது. ஸ்ருதி கதவைத் திறந்துள்ளார். அப்போது அந்த நபர், ஸ்ருதிஹாசனை பிடிக்க முயன்று, வீட்டிற்குள் வர முயற்சித்திருக்கிறார். உடனே ஸ்ருதிஹாசனை வீட்டுக் கதவினை அந்த நபர் முகத்தின் மீது மோதச் செய்து, அக்குடியிருப்பின் காவல்காரருக்கு தெரியச் செய்திருக்கிறார்.

காவலாளிகள் அந்த நபரை, அக்குடியிருப்பில் இருந்து வெளியேற்றி இருக்கிறார்கள். இச்சம்பவம் பெரும் பரபரப்பை ஏற்படுத்தி இருக்கிறது. இத்தாக்குதல் குறித்து ஸ்ருதி ஹாசன், போலீசில் புகார் அளிக்கவில்லை என்பது குறிப்பிடத்தக்கது.

இது குறித்து ஸ்ருதிஹாசன் “நான் நலமாக இருக்கிறேன். நலம் விசாரித்த அனைவருக்கும் நன்றி” என்று தனது ட்விட்டர் தளத்தில் தெரிவித்துள்ளார்.

கோவா: தொடங்கியது சர்வதேச திரைப்பட விழா

கோவா தலைநகர் பனாஜியில் சர்வதேச திரைப்பட விழா புதன்கிழமை விமர்சையாக தொடங்கியது. இதில், பழம் பெரும் ஹிந்தி நடிகை வஹீதா ரஹ்மானுக்கு இந்திய சினிமாவின் நூற்றாண்டு கொண்டாட்ட நினைவு விருது வழங்கப்பட்டது. "இந்த விருது தனக்கு மிகுந்த கொளரவத்தை அளித்துள்ளது' என்று வஹீதா ரஹ்மான் நெகிழ்ச்சியுடன் கூறினார்.

இந்த விழாவில் ஹாலிவுட் நடிகை சூசன் சரன்டன், நடிகர் கமலஹாசன், நடிகை ரேகா, பின்னணிப் பாடகி ஆஷா போஸ்லே, சுகாசினி மணிரத்னம் உள்ளிட்ட திரைப்பட பிரபலங்கள் பங்கேற்றனர்.

பத்து நாள்கள் நடைபெறும் இந்த விழாவில், 328 படங்கள் திரையிடப்படுகின்றன. அதில், 75 நாடுகளைச் சேர்ந்த 171 சர்வதேச படங்களும் அடங்கும். தொடக்க விழாவில் உரையாற்றிய கோவா முதல்வர் மனோஹர் பாரிக்கர், "கடந்த 9 ஆண்டுகளாக சர்வதேசத் திரைப்பட விழா கோவாவில் நடைபெற்று வருகிறது. அடுத்த ஆண்டு நடைபெறும் கொண்டாட்டத்தின் போது, சர்வதேச திரைப்பட விழாவுக்கென பிரத்யேக நிரந்தரக் கட்டடம் கடலோரமாக உள்ள மிராமர் பகுதியில் திறக்கப்படும்' என்று கூறினார்.

விழாவில் பங்கேற்ற மத்திய தகவல் மற்றும் ஒளிபரப்புத்துறை அமைச்சர் மணீஷ் திவாரி, பின்னர் செய்தியாளர்களிடம் பேசுகையில், "சர்வதேச திரைப்பட விழா வழக்கம் போல் அடுத்த ஆண்டும் கோவாவிலேயே நடைபெறும். இந்த விழா நடைபெறும் இடத்தை மாற்ற மத்திய அரசு திட்டமிட்டு வருவதாக கூறப்படுவது வெறும் வதந்தி' என்று கூறினார்.

கோவா மாநிலம் பனாஜியில், 44-வது இந்திய சர்வதேச திரைப்பட விழாவை பழம்பெரும் நடிகை வஹீதா ரஹ்மான் புதன்கிழமை குத்துவிளக்கேற்றித் தொடங்கிவைக்கிறார்.

உடன், மத்திய தகவல் - ஒலிபரப்புத் துறை அமைச்சர் மணீஷ் திவாரி, நடிகர் கமல்ஹாசன் உள்ளிட்டோர்.

வேடந்தாங்கல் பறவைகள் சீசன் தொடங்கியது

மதுராந்தகம் அருகே வேடந்தாங்கல் பறவைகள் சரணாலயத்தில் வெளிநாட்டுப் பறவைகள் வந்து தங்கும் சீசன் தொடங்கியுள்ளது. பொதுமக்கள் பார்வைக்கு இச்சரணாலயம் வெள்ளிக்கிழமை முதல் (நவ. 22) திறந்துவிடப்படுகிறது.

செங்கல்பட்டுக்கு தென்மேற்கில் செங்கல்பட்டு - உத்தரமேரூர் சாலையில் 25 கி.மீ. தொலைவில் உள்ளது வேடந்தாங்கல் பறவைகள் சரணாலயம்.

ஆண்டுதோறும் அக்டோபர் முதல் மார்ச் மாதம் வரை இங்கு வெளிநாட்டுப் பறவைகள் தங்கி முட்டையிட்டு இனப்பெருக்கம் செய்வது வழக்கம்.

நீர் நிறைந்த பகுதிகளில் பறவைகள் தங்கி ஓய்வு எடுக்கின்றன. வேடந்தாங்கல் பகுதியைச் சுற்றியுள்ள மதுராந்தகம், வெள்ளபுதூர், வளையபுதூர், உத்தரமேரூர், மலைவையாவூர் நீர்ப் பிடிப்புப் பகுதிகளில் இருந்து வேடந்தாங்கல் ஏரிக்கு நீர்வரத்து செய்யப்படுகிறது.

கடந்த சிலநாள்களாக பெய்து வந்த கனமழை காரணமாக ஏரிகளில் இருந்து பெறப்படும் நீர் பொதுப்பணித் துறையினரால் கட்டப்பட்ட இரண்டு பெரிய கால்வாய்கள் வழியாக வந்து வேடந்தாங்கல் ஏரியின் நீர்மட்டத்தை கணிசமாக உயர்த்தியுள்ளது.

வேடந்தாங்கல் ஏரியில் நீர் நிரம்பியுள்ள நிலையில் சீசனும் தொடங்கிவிட்டது. பல தேசங்களில் இருந்து பறவைகள் வேடந்தாங்கலுக்கு படையெடுக்கத் தொடங்கியுள்ளன. தற்போது வேடந்தாங்கலுக்கு வரும் வெளிநாட்டுப் பறவைகளின் எண்ணிக்கை அதிகரித்து வருகின்றன.கீழே சிறுத்தும் அகன்று விரிந்த கிளைகளும் கொண்ட கடம்ப மரங்கள்தான் இந்த பறவைகளின் தேர்வாக உள்ளது. பறவைகளுக்குப் பிடித்த இந்த கடம்ப மரங்கள் வேடந்தாங்கல் ஏரிப் பகுதிகளில் அதிகம் காணப்படுகின்றன. கூடுகட்டி வசிப்பதற்கு ஏற்றதாக உள்ளதால் பறவைகள் இப்பகுதியை தேர்ந்தெடுக்கின்றன.

இவற்றின் வரவை எதிர்நோக்கி வனத்துறையினர் அதிக எண்ணிக்கையில் கடம்ப மரங்களை வளர்த்துள்ளனர்.

மேலும் 73 ஏக்கர் பரப்பில் விரிந்துள்ள வேடந்தாங்கல் பறவைகள் சரணாலயம் இந்தியாவின் பழமையான நீர்ப் பறவைகளின் சரணாலயமாக விளங்குகிறது.

மேலும் இங்கு வரும் சுற்றுலாப் பயணிகள் ஏரிக்குள் வளர்ந்துள்ள கடம்ப மரங்களில் கூடுகட்டி வாழும் பறவைகளை கண்டு களிக்கும் வகையில் ஏரிக்கரையோரமாக 1.4 கி.மீ. தொலைவில் பாதை அமைக்கப்பட்டுள்ளது.

மேலும் சுற்றுலாப் பயணிகள் கண்டுகளிக்க உயரமான பரண் அமைக்கப்பட்டு பைனாகுலர் மூலமாக பறவைகளை கண்ணருகில் பார்த்து ரசிக்கும் வசதியையும் வனத்துறையினர் செய்துள்ளனர்.

கனடா, சைபீரியா, பங்களாதேஷ், ஆஸ்திரேலியா ஆகிய குளிர்பிரதேச நாடுகளிலிருந்து மிகவும் அரிதான 26 பறவை வகைகள் உள்பட 45 ஆயிரம் பறவையினங்கள் இங்கு வந்து தங்கிச் செல்வது வழக்கம். கொக்கு வகைகள், நீர்காகங்கள், நாரைகள், வெள்ளை நாரை, கூழைக்கடா, நைட்ஹெரான், க்ரே ஹெரான், ஸ்பூன்பில், லிட்டில் எக்ரெட், ஒயிட் இபிஸ், கேட்டில் எக்ரெட், பின்டெய்ல் என்னும் ஊசிவால் வாத்து, டாப் சிக், ஷோவல்லர டக் உள்ளிட்ட பல்வேறு பறவைகள் தங்கள் நாட்டிலிருந்து வேடந்தாங்கலுக்கு வந்து தங்கி இனப்பெருக்கத்தில் ஈடுபட்டு விடைபெற்றுச் செல்கின்றன.

மேலும் குளிர் பிரதேசங்களில் இருந்து வரும் உள்ளான், பழுப்பு வாலாட்டி போன்ற பறவையினங்களுடன் உள்நாட்டுப் பறவைகளான வெள்ளை அரிவாள் மூக்கன், குருட்டு கொக்கு, நத்தை குத்தி நாரை போன்ற பறவைகளும் வேடந்தாங்கல் ஏரிக்கு வருகை தருகின்றன.இச்சரணாலயத்தில் வெளிநாட்டுப் பறவைகள் வந்து தங்கும் சீசன் தொடங்கியுள்ள நிலையில், வனத்துறையினர் கட்டுப்பாட்டில் உள்ள இச்சரணாலயம் பொதுமக்கள் பார்வைக்கு வெள்ளிக்கிழமை முதல் திறக்கப்படுகிறது.

தங்கும் வசதிகள் தேவை:இச்சரணாலயத்துக்கு வந்து செல்லும் சுற்றுலாப் பயணிகளுக்காக குடிநீர் வசதி, கழிப்பிடம் மற்றும் பறவைகளை கண்டுகளிக்க கூடுதல் கோபுரங்களையும் அமைத்துள்ளனர்.

ஆனால் இங்கு வரும் வெளிநாட்டுச் சுற்றுலாப் பயணிகள் தங்குவதற்கான வசதிகளை தமிழக அரசு ஏற்படுத்தித் தர வேண்டும் என்பதே அனைவரின் கோரிக்கையாகும்.

22 முதல் சரணாலயம் திறப்பு

வேடந்தாங்கல் நாட்டின் பழமையான நீர்ப் பறவைகள் சரணாலயமாகும். கனடா, சைபீரியா,ஆஸ்திரேலியா ஆகிய குளிர்பிரதேச நாடுகளிலிருந்து மிகவும் அரிதான 26 பறவை வகைகள் உள்பட 45 ஆயிரம் பறவையினங்கள் இங்கு வந்து தங்கிச் செல்வது வழக்கம்.