கூந்தல் உதிர்வை தடுக்கும் இயற்கை வழிகள்! ஹெல்த் ஸ்பெஷல்!!

இன்று பெண்களைப் போல ஆண்களும் தங்கள் தலைமுடியைக் காப்பதில் அதிக ஆர்வம் காட்டுகின்றனர். ஆண்களுக்கும், பெண்களும் உதவும், முடிகாக்கும் குறிப்புகள் இவை... 

* வேப்பிலை ஒரு கைப்பிடி எடுத்து நீரில் வேக வைத்து ஒருநாள் கழித்து வேக வைத்த நீரைக் கொண்டு தலை கழுவி வந்தால் முடி கொட்டுவது நின்றுவிடும். 

* கடுக்காய், தான்றிக்காய், நெல்லிக்காய் பொடிகளை கலந்து இரவில் தண்ணீரில் காய்ச்சி ஊறவைத்து, காலையில் எலுமிச்சை பழச்சாறு கலந்து கலக்கி, தலையில் தேய்த்துக் குளித்துவர முடி உதிர்வது நிற்கும். 

* வெந்தயம், குன்றிமணி பொடி செய்து தேங்காய் எண்ணெயில் ஊறவைத்து ஒரு வாரத்துக்குப் பின் தினமும் தேய்த்து வந்தால் முடி உதிர்வது நிற்கும். 

* முடி உதிர்ந்த பகுதிகளில் முடி வளர கீழா நெல்லி வேரை சுத்தம் செய்து சிறிய துண்டாக நறுக்கி தேங்காய் எண்ணையில் போட்டு காய்ச்சி தலைக்கு தடவி வந்தால் பலனிருக்கும். 

* இளநரை கருப்பாக, நெல்லிக்காயை அடிக்கடி உணவில் சேர்த்து வரலாம். 

* முடி கருப்பாக, ஆலமரத்தின் இளம்பிஞ்சு வேர், செம்பருத்திப் பூ இடித்துத் தூள் செய்து, தேங்காய் எண்ணையில் காய்ச்சி ஊறவைத்து தலைக்கு தேய்த்து வர வேண்டும். 

* காய்ந்த நெல்லிக்காயை பவுடராக்கி, தேங்காய் எண்ணையுடன் கலந்து கொதிக்க வைத்து வடிகட்டி தேய்த்துவந்தால் முடி கருமையாகும். 

* தலைமுடி கருமை, மினுமினுப்புப் பெற அதிமதுரம் 20 கிராம் அளவை, 5 மில்லி தண்ணீரில் காய்ச்சி ஆறிய பின் பாலில் ஊறவத்து, 15 நிமிடம் கழித்து கூந்தலில் தடவி, ஒரு மணி நேரம் ஊற வைத்து குளிக்க வேண்டும். 

* செம்பட்டை முடி நிறம் மாற, மரிக்கொழுந்து இலையையும் நிலாவரை இலையையும் சம அளவு எடுத்து அரைத்துத் தலைக்குத் தடவினால் செம்பட்டை முடி நிறம் மாறும். 

* நரை போக்க தாமரைப் பூ கஷாயம் வைத்து காலை, மாலை தொடர்ந்து குடித்து வந்தால் நரை மாறிவிடும். 

* முடி வளர்வதற்கு கறிவேப்பிலை அரைத்து தேங்காய் எண்ணையில் கலந்து காய்ச்சி தலையில் தேய்க்கவும். 

* கேரட், எலுமிச்சம் பழச்சாறு கலந்து தேங்காய் எண்ணையில் கலந்து காய்ச்சி தலையில் தேய்க்கவும். 

* முடிகொட்டிய இடத்தில் முடி வளர நேர்வாளங்கொட்டையை உடைத்து பருப்பை எடுத்து நீர் விட்டு நன்றாக அரைத்துத் தடவிவர வேண்டும். 

* புழுவெட்டு மறைய, நவச்சாரத்தை தேனில் கலந்து தடவினால் திட்டாக முடிகொட்டுதலும், புழுவெட்டும் மறையும்.

உதட்டின் மேல் மீசை போல் ரோமம் முளைத்து அருவருப்பாக உள்ளதா? கவலை வேண்டாம்.

உதட்டின் மேல் மீசை போல் ரோமம் முளைத்து அருவருப்பாக உள்ளதா? கவலை வேண்டாம்.

குப்பை மேனி இலை, வேப்பங்கொழுந்து, விரலி மஞ்சள் ஆகியவற்றை சேகரித்து கொள்ளவும்.

இவற்றை மாவு போல் நன்றாக அரைத்து, படுக்கைக்கு போகும் முன் மேல் உதட்டில் பூசவும்.

தொடர்ந்து இரு வாரங்கள் பூசி வந்தால், ரோமம் அல்லது மீசை போல் அருவருப்பாக இருக்கும் முடி உதிர்ந்து உதடுகள் பளிச்சிடும.

ரஜினியின் வயது 162.. கமலுக்கு 158!

ரஜினியின் வயது 162. இப்படி சென்னையில் ஒட்டப்பட்டுள்ள போஸ்டர் பலரது கவனத்தையும் கவர்ந்துள்ளது. டிசம்பர் 12 ந் தேதி ரஜினிக்கு பிறந்த நாள். அதற்கு முன்னதாக தமிழகமெங்கும் இப்படியொரு போஸ்டர் ஒட்டப்பட்டு வருகிறது.

ரஜினி மட்டுமல்ல, உலகின் முன்னணி பிரபலங்கள் பலரது புகைப்படத்துடன் அவர்களின் வயதை தாறுமாறாக அதிகப்படுத்தி குறிப்பிடப்பட்டிருக்கும் இந்த சுவரொட்டியை பார்த்து, ரசிகர்கள் என்னவென்று புரியாமல் வியந்தபடியும் தங்களுக்குள் விவாதித்தபடியும் செல்கிறார்கள்.

‘சாய்ந்தாடு சாய்ந்தாடு' படத்திற்கான பிரமோஷன் போஸ்டர்தான் அது என்றாலும், படத்தில் இதுகுறித்த விளக்கங்கள் காட்சியாக வைக்கப்பட்டிருக்கிறதா என்ற சந்தேகத்தோடு பத்திரிகையாளர்களும் படத்தின் இயக்குநர் கஸாலியை தொடர்பு கொண்டு விசாரித்து வருகிறார்கள்.

கஸாலி கூறும்போது, ‘இந்த போஸ்டரில் உள்ள பிரபலங்களுக்கு நாங்கள் குறிப்பிட்டிருக்கும் வயதிற்கும், கதைக்கும் ஒரு நெருங்கிய தொடர்பு இருக்கிறது. நம்மால் வியக்கப்பட்ட இந்த பிரபலங்கள் சராசரி வயதிற்கும் மேல் இன்னும் ஐம்பது ஆண்டுகளோ, அதையும் தாண்டியோ, மாறாத இளமையோடும் உற்சாகத்தோடும் வாழ்ந்தால் அது எவ்வளவு சந்தோஷமான விஷயம்? அப்படியொரு கனவை மெய்யாக்க நினைக்கிற விஷயம் ஒன்றும் படத்தில் இடம் பெறுகிறது. அதை சூசகமாக சொல்லதான் இப்படி ஒரு போஸ்டரை உருவாக்கினோம்' என்றார்.

கஸாலியின் கனவு நனவானால் ரசிகர்களுக்கு கொண்டாட்டம்தான்!

இப்படி நானே எனக்கு ஆப்பு வச்சுகுவேனா: புலம்பும் நடிகர்

சென்னை: பவர் நடிகர் தனது வாயால் தனக்கு தானே ஆப்பு வைத்துக் கொண்டுள்ளார்.

பில்டப்புக்கு பெயர் போன பவர் நடிகருக்கு சினிமாவில் பெயர் வாங்கிக் கொடுத்தது என்னவோ சந்தன நடிகரின் லட்டு படம் தான். இதையடுத்து மளமளவென பல படங்களில் ஒப்பந்தமான பவர் மோசடி வழக்குகளில் சிக்கி சிறை சென்றார்.

இந்நிலையில் எந்த படத்தை எடுத்தாலும் பிரமாண்டமாக எடுத்து வெற்றி கொடுக்கும் 4 எழுத்து இயக்குனரின் படத்தில் பவர் ஒப்பந்தமானார். அந்த பிரமாண்ட இயக்குனர் தனது படம் ரிலீஸாகும் வரை அது குறித்த தகவல்களை கசியக்கூட விட மாட்டார். அதனால் பவரிடம் உங்களின் கதாபாத்திரம் பற்றி எதுவும் வெளியே சொல்ல வேண்டாம் என்று கூறியிருக்கிறார்.

ஆனால் பவரால் வாயைக் கட்டுப்படுத்த முடியாமல் அனைத்தையும் உளறித் தள்ளிவிட்டார். சிறைக்கு சென்ற தனக்கு இந்த படம் பெரிய திருப்புமுனையாக இருக்கும் என்று கூறி வந்தார். தான் இவ்வளவு கூறியும் உளறியதால் ஆத்திரமடைந்த இயக்குனர் பவர் வரும் காட்சிகளை கத்தரித்துவிட்டாராம்.

இப்படி என் வாயால் எனக்கு நானே ஆப்பு வைப்பேனா என்று பவர் நடிகர் தற்போது புலம்புகிறாராம்.

கன்னட நடிகரின் வீடு புகுந்து மிரட்டி ரூ.8 லட்சம் கொள்ளை

பெங்களூர்: கன்னட நடிகர் ஹர்ஷாவின் வீட்டுக்குள் புகுந்த 4 ஆயுதம் ஏந்திய நபர்கள் வீட்டில் உள்ளவர்களை மிரட்டி செல்போன்கள், நகைகள், ரூ.1 லட்சம் ரொக்கம் என மொத்தம் ரூ.8 லட்சம் மதிப்புள்ளவற்றை கொள்ளையடித்துச் சென்றுள்ளனர்.

கன்னட படங்கள் மற்றும் தொலைக்காட்சி தொடர்களில் நடித்து வருபவர் ஹர்ஷா. மேற்கு பெங்களூரில் உள்ள நாகர்பாவியில் அவர் தனது அப்பா பிரகாஷ், அம்மா விமலா மற்றும் உறவினர் ஒருவருடன் வசித்து வருகிறார். இந்நிலையில் அவர் ஷூட்டிங் முடித்துவிட்டு நேற்று முன்தினம் இரவு 9.45 மணிக்கு பைக்கில் வீட்டுக்கு வந்துள்ளார்.

பைக்கை வீட்டு வாசலில் நிறுத்திக் கொண்டிருந்தபோது அரிவாள் ஏந்தி முகமூடி அணிந்த 4 பேர் ஹர்ஷாவை மிரட்டி வீட்டுக்குள் அழைத்துச் சென்றுள்ளனர். வீட்டிக்குள் சென்ற உடன் அவர்கள் அங்கிருந்தவர்களை படுக்கையறையில் உட்காரும்படி கூறியுள்ளனர். இரண்டு பேர் ஹர்ஷாவின் குடும்பத்தாரை கண்காணிக்க மற்ற இரண்டு பேர் வீட்டில் இருந்த ரூ.1 லட்சம் ரொக்கம், நகை, வெள்ளிப் பொருட்கள், செல்போன்களை திருடினர். அவற்றின் மதிப்பு ரூ.8 லட்சம் ஆகும்.

அவர்கள் திருடிவிட்டு வீட்டை வெளிப்புறமாக பூட்டிவிட்டு தப்பியோடிவிட்டனர். விமலாவின் செல்போன் மேஜையில் துணிக்கு அடியில் இருந்ததால் அதை அவர்கள் பார்க்கவில்லை. இதையடுத்து அந்த செல்போன் மூலம் அக்கம்பக்கத்தினரை அழைக்க அவர்கள் வந்து சாவியை தேடி வீட்டைத் திறந்தனர்.

இந்த சம்பவம் பற்றி வழக்குப் பதிவு செய்துள்ள போலீசார் விசாரணை நடத்தி வருகின்றனர். ஹர்ஷாவின் குடும்பத்திற்கு தெரிந்த யாரோ தான் திருடியிருக்க வேண்டும் என்று அவர்கள் சந்தேகிக்கின்றனர்.

கவர்ச்சியில் முதலிடம் பிடித்தாலும், பின்னழகில் பின்தங்கிப் போன சன்னி லியோன்!

பாலிவுட் நடிகைகளில் கவர்ச்சிகரமான பின்னழகு கொண்டவர் யார் என்பதற்கான கருத்து கணிப்பில் ப்ரியங்கா சோப்ராவுக்கு முதலிடம் கிடைத்துள்ளது. இதில் கடைசி இடம் பிடித்துள்ளார் கவர்ச்சி நடிகை சன்னி லியோன்.

இப்போது முன்னணியில் உள்ள பாலிவுட் நடிகைகளில் சிறந்த பின்னழகு யாருக்கு உள்ளது என்பதற்கான கருத்துக் கணிப்பை ஒரு இணையதளம் மேற்கொண்டது.

இந்தக் கருத்துக் கணிப்பில் பாலிவுட்டின் முதல் நிலை நாயகிகளுள் ஒருவரான ப்ரியங்கா சோப்ராவுக்கு முதலிடம் கிடைத்தது. அவர் பெற்ற வாக்குகள் 28.3 சதவீதம். ஏற்கெனவே சிறந்த கால் அழகிக்கான போட்டியிலும் முதலிடம் பெற்றவர் ப்ரியங்கா என்பது நினைவிருக்கலாம்.

இந்த வாக்கெடுப்பில் தீபிகா படுகோனுக்கு இரண்டவது இடம் கிடைத்தது. அவர் பெற்ற வாக்குகள் 21 சதவீதம். இந்த ஆண்டில் அடுத்தடுத்து மூன்று படங்களில் நடித்துள்ளார். அனைத்துமே ரூ 100 கோடிக்கு மேல் குவித்தவை என்பது குறிப்பிடத்தக்கது.

பொது நிகழ்ச்சிகள் மற்றும் விழாக்களுக்கு வரும்போது முதுகு தெரிய ஆடை உடுத்தி வருவது கரீனா வழக்கம். இவர் 19.38 வாக்குகள் பெற்று மூன்றாவது இடத்தைப் பிடித்துள்ளார்.

முதுகழகைக் காட்டத் தயங்காத இன்னொரு பாலிவுட் நடிகை பிபாஷா பாசுவுக்கு நான்காவது இடம் கிடைத்துள்ளது. அவர் பெற்றுள்ள வாக்குகள் 7.05 சதவீதம்.

சன்னி லியோன் ஐந்தாவது இடம்

கவர்ச்சித் தோற்றத்தில் முதல் இடத்தில் உள்ள சன்னி லியோனுக்கு, இந்த பின்னழகிப் போட்டியில் 5வது இடம்தான் கிடைத்திருக்கிறது.

புகைப்பழக்கத்துக்கு எதிராக முகத்தை துணியால் மூடிக் கொண்டு 7 கிமீ சைக்கிள் ஓட்டிய ரஜினி ரசிகர்!

கண்களைக் கட்டிக் கொண்டு சைக்கிள் ஓட்டும் இந்த சின்னஞ்சிறுவன் ஒரு தீவிர ரஜினி ரசிகன்... ஸ்ரீரங்கத்தைச் சேர்ந்தவன். பெயர் அரவிந்த்.

ஏழாம் வகுப்பு படிக்கும் இந்த சிறுவன், சூப்பர் ஸ்டார் ரஜினி பிறந்த நாளையொட்டி புகைப் பழக்கத்துக்கு எதிராக ஒரு விழிப்புணர்வுப் பிரச்சாரமாக இப்படி முகம் முழுவதையும் மூடிக் கொண்டு 7 கிலோ மீட்டர் தூரம் பயணம் மேற்கொண்டான். அவனைப் பின் தொடர்ந்து ரஜினி ரசிகர்களும் வாகனங்களில் சென்றனர்.

ரஜினியின் உருவப்படம் பொறித்த பனியன் அணிந்து சாலையில் எந்தத் தடுமாற்றமும் இல்லாமல் இந்த தூரத்தை அந்த சிறுவன் கடந்தது பார்ப்பவர்களை வியப்பின் உச்சிக்கு கொண்டு சென்றது.

ஸ்ரீரங்கத்தில் நடந்த இந்த நிகழ்ச்சியை ஸ்ரீரங்கம் நகர ரஜினிகாந்த் தலைமை நற்பணி மன்றம் செய்திருந்தது.

'புகைப்பழக்கத்தை விட்டொழிக்குமாறு மக்களுக்கு தலைவர் ரஜினி வேண்டுகோள் விடுத்துள்ளார். அவரது வேண்டுகோளை எங்களால் முடிந்த அளவு பிரச்சாரமாக்கியுள்ளோம். இதுபோன்ற பிரச்சாரங்களை தொடர்ந்து செய்வோம். தலைவர் சொன்ன அறிவுரையைக் கேட்டு பலரும் ஏற்கெனவே புகைப்பழக்கத்தை விட்டுவிட்டார்கள் என்பதையும் குறிப்பிட விரும்புகிறோம்," என்றனர் நிகழ்ச்சிக்கு வந்திருந்த ரஜினி மன்ற நிர்வாகிகள்.

7 கிலோமீட்டர் தூரம் முகத்தை மூடியபடி சைக்கில் ஓட்டி வியக்க வைத்த சிறுவன் அரவிந்த்தின் தந்தையும் தீவிர ரஜினி ரசிகர். ஸ்ரீரங்கம் மன்ற நிர்வாகி.

முன்னதாக ரஜினி பிறந்த நாளையொட்டி, ஸ்ரீரங்கம் ஸ்ரீராகவேந்திரர் மடத்தில் தங்கத் தேர் இழுத்தனர் ரசிகர்கள். பின்னர் 1000 பேருக்கு மண்டபத்திலேயே அறுசுவை உணவு பரிமாறினர்.

இந்த நிகழ்ச்சியில் திருச்சி மாவட்ட ரஜினிகாந்த் நற்பணி மன்ற நிர்வாகிகள் எஸ் கர்ணன், தென்னூர் உதயா, ராயல் ரம்பா செந்தில், ஆர்கேஎஸ் ராஜ், ராயல் ராஜ், திருச்சி ரஞ்சித் குமார், ஸ்வீட் ரமேஷ், ஆட்டோ வேலு, ஆர் சுரேஷ் உள்ளிட்டோர் கலந்து கொண்டனர்.

ரஜினியின் பிறந்த நாளான டிசம்பர் 12-ம் தேதி மேலும் பல நற்பணி நிகழ்ச்சிகளை ஏற்பாடு செய்துள்ளனர் இந்த நிர்வாகிகள்.

புனித் ராஜ்குமார் ஜோடியாக கன்னடத்தில் அறிமுகமாகும் த்ரிஷா... சம்பளம் ஒரு கோடி?

பெங்களூர்: நடிகை த்ரிஷா கன்னடத்தில் அறிமுகமாகிறார், புனித் ராஜ்குமார் ஜோடியாக.

தெலுங்கில் பெரும் வெற்றி தூக்குடு படத்தின் கன்னட ரீமேக்கில்தான் அவர் நடிக்கப் போகிறார்.

கன்னட திரைப்பட உலகம் ஒப்பீட்டளவில் சிறியது என்பதால், அங்கு சம்பளமும் குறைவுதான். படத்தின் பட்ஜெட் காரணமாக பெரிய நடிகைகளை கன்னடத் தயாரிப்பாளர்கள் ஒப்பந்தம் செய்வதுமில்லை.

ஆனால் இப்போது நிலைமை மெல்ல மாறி வருகிறது. சமீபத்திய சில கன்னடப் படங்கள் நல்ல வசூலைக் குவித்து வருகின்றன.
எனவே பெரிய நடிகைகளை ஒப்பந்தம் செய்யும் போக்கு ஆரம்பித்துள்ளது.
புனித் ராஜ்குமார் ஹீரோவாக நடிக்கும் புதிய படத்தில் த்ரிஷாவை ஒப்பந்தம் செய்துள்ளனர். தெலுங்கில் வெற்றி பெற்ற தூக்குடு படத்தைத் தயாரித்தவர்களே, அதன் கன்னடப் பதிப்பையும் தயாரிக்கின்றனர்.
இந்தப் படத்தில் நடிக்க த்ரிஷாவுக்கு ரூ 1 கோடி வரை சம்பளம் தர தயாரிப்பாளர்கள் சம்மதம் தெரிவித்துள்ளனர்.
கடந்த 10 ஆண்டுகளுக்கும் மேல் சினிமாவில் நிலைத்துள்ள த்ரிஷா, இன்னும் தன் மார்க்கெட மவுசு குறையாமலிருப்பது குறிப்பிடத்தக்கது.

'9 வருஷமா வளத்த நாய் செத்துப் போச்சு.. மனசு உடைஞ்சு போயிருக்கேன்' - த்ரிஷா

ஒன்பது ஆண்டுகளாக தான் ஆசையோடு வளர்த்த நாய் இறந்து விட்டதால் மனமுடைந்து போய் உள்ளதாக நடிகை த்ரிஷா தெரிவித்துள்ளார்.

நடிகை த்ரிஷாவுக்கு நாய்கள் மீது அலாதி பிரியம். தெருவில் சுற்றும் நாய்களை தத்தெடுத்து அவற்றை பராமரிப்பது இவருக்கு மிகப் பிடித்த ஹாபியாக உள்ளது.

9 ஆண்டுகளுக்கு முன்பு ஹைதராபாத் சாலையில் அனாதையாக கிடந்த ஒரு நாய்க்குட்டியை த்ரிஷா தூக்கி வந்து, தன் சென்னை வீட்டில வைத்து வளர்த்தார். அதற்கு காட்பரி என பெயரிட்டார்.

அந்த நாய் மீது திரிஷாவுக்கு அளவு கடந்த பாசம் ஏற்பட்டது. படப்பிடிப்பு ஓய்வில் இந்த நாயுடன்தான் விளையாடுவார். விதவிதமான ஆடைகள் அணிவித்து அழகு பார்ப்பார்.

இந்த நாய்க்கு திடீரென உடல் நலக்குறைவு ஏற்பட்டது. உடனடியாக கால்நடை மருத்துவமனையில் சேர்த்தார். டாக்டர்கள் பரிசோதித்து வயிற்றில் கட்டி இருப்பதாக கூறினர். அதை அகற்ற அறுவை சிகிச்சை செய்தார்கள். அப்போது நாய் இறந்து போனது.

இது த்ரிஷாவை கோபத்தில் தள்ளிவிட்டது. இதுகுறித்து அவர் கூறுகையில், "நான் வளர்த்த நாய் இறந்து போனதை எனக்கு ஏற்பட்ட மோசமான இழப்பாக கருதுகிறேன். மனம் உடைந்து போய் இருக்கிறேன். இந்த துக்கத்தில் இருந்து படிப்படியாக மீள முயற்சித்துக் கொண்டிருக்கிறேன்," என்றார்.

ஆந்திராவிலும் வாய்ப்பு லேது... அதிர்ச்சியில் அஞ்சலி!

தமிழ் சினிமாவில் இனி நடிப்பதாக இல்லை என்று கூறிவிட்டு ஆந்திரா பக்கம் ஒதுங்கிய அஞ்சலி, குறுகிய காலத்திலேயே அங்கும் வாய்ப்பை இழந்து தடுமாறும் நிலைக்கு வந்துவிட்டார்.

நடிகை அஞ்சலி தன் சித்தியுடனான கருத்து வேறுபாடு காரணமாக ஆந்திராவில் அடைக்கலமானார். அப்போது அவருக்கு தமிழில் நல்ல மார்க்கெட். முன்னணி ஹீரோக்களின் படங்களில் ஒப்பந்தமாகியிருந்தார்.

ஹைதராபாத் போய் நிலைமை சகஜமான பிறகும் அவர் சென்னைப் பக்கம் வரவில்லை. தன் வீட்டை சித்தி அபகரித்துக் கொண்டதாலும், உயிருக்குப் பாதுகாப்பாற்ற நிலை இருப்பதாலும் தமிழில் நடிக்க மாட்டேன் என மறுத்துவிட்டார்.

மேலும் தான் இருக்கும் இடத்தையும் கூட யாருக்கும் தெரிவிக்கவில்லை. சுந்தர் சி படம், ராகவா லாரன்ஸ் படம் போன்றவற்றில் நடிக்கும் வாய்ப்பையும் இழந்தார்.

இந்த நிலையில் அஞ்சலியின் உடலும் பருமனாக ஆரம்பித்துவிட்டது. சமீபத்தில் நிகழ்ச்சி ஒன்றுக்கு வந்த அஞ்சலியின் உப்பிப் போன முகத்தையும், பருத்த உடலையும் பார்த்து திரையுலகினர் அதிர்ந்து போனார்களாம்.

இப்போதைக்கு தெலுங்கில் ஒரு படம் கூட கைவசம் இல்லை அஞ்சலிக்கு. அவரது இப்போதைய தோற்றத்தால், வாய்ப்பு தரவும் யோசிக்கிறார்களாம் ஆந்திர திரையுலகினர். எனவே மீண்டும் தமிழில் வாய்ப்பு தேட முடிவு செய்துள்ள அவர், அதற்கு வசதியாக சித்தியிடமிருந்து வீட்டைப் பெற முயற்சித்து வருகிறார்.

தமிழில் விஷாலுடன் அவர் நடித்த மதகஜராஜா மட்டுமே இப்போது வெளியாக வேண்டிய படம் என்பது குறிப்பிடத்தக்கது.

தாட்கோ மேம்பாட்டுத் திட்டம்: ஆன்-லைனில் விண்ணப்பிக்க அறிவிப்பு

திருவள்ளூர் மாவட்டத்தில் தாட்கோ மூலம் ஆதிதிராவிடர்களுக்காக செயல்படுத்தப்படும் பொருளாதார மேம்பாட்டுத் திட்டங்களுக்கு ஆன்லைன் மூலம் விண்ணப்பிக்க திருவள்ளூர் மாவட்ட நிர்வாகம் அறிவித்துள்ளது. இதுகுறித்து மாவட்ட ஆட்சியர் கொ. வீரராகவ ராவ் வெளியிட்டுள்ள செய்திக் குறிப்பில் கூறியிருப்பதாவது:-

இம்மாவட்டத்தில் தாட்கோ மூலம் பொருளாதார மேம்பாட்டுத் திட்டங்களுக்கு டிசம்பர் 6  முதல் 22-ஆம் தேதி வரை ஆன்லைனில் விண்ணப்பங்கள் வரவேற்கப்படுகின்றன.

இதில், பெண்களுக்கான நிலம் வாங்கும் திட்டம், ஆண், பெண் இருவருக்கும் நிலம் மேம்பாட்டு திட்டம், தொழில் முனைவோர் திட்டம், பெட்ரோல், டீசல், கேஸ் சில்லறை விற்பனை நிலையம், இளைஞர்களுக்கான சுயவேலை வாய்ப்புத் திட்டம், மருத்துவமனை, மருந்துக் கடை, மூக்கு கண்ணாடியகம், முடநீக்கு மையம், ரத்தப் பரிசோதனை நிலையம், மகளிர் குழுவினருக்கான சுழல் நிதி மற்றும் பொருளாதார கடனுதவி, விருப்புரிமை நிதி, இந்திய குடிமைப் பணி முதன்மைத் தேர்வு எழுதுவோருக்கு நிதியுதவி, பட்டயக் கணக்கர், செலவு கணக்கர்கள் சொந்தமாக தொழில் செய்ய நிதியுதவி போன்ற தொழில்களுக்கு மானியத்துடன் கூடிய கடனுதவி வழங்கப்படும்.

தகுதிகள்: விண்ணப்பதாரர் 18 வயது நிரம்பியவராக இருக்க வேண்டும். குடும்ப ஆண்டு வருமானம் 1 லட்சம் மிகாமல் இருக்க வேண்டும். பெட்ரோல், டீசல், கேஸ் சில்லறை விற்பனை நிலையம் அமைக்க ரூ. 3 லட்சம் வரை குடும்ப ஆண்டு வருமானம் இருக்கலாம்.

இத்திட்டத்தில் பயன்பெற விரும்புவோர் http:application.tahdco.com  என்ற இணையதள முகவரியில் ஆன் லைனில் விண்ணப்பிக்க வேண்டும். அதில் பதிவு செய்யும்போது ரேஷன் கார்டு எண் அல்லது இருப்பிடச் சான்று, ஜாதிச் சான்று, வருமானச் சான்று ஆகியவற்றின் எண் மற்றும் அதை வழங்கிய நாள், திட்ட அறிக்கை பெறப்பட்ட தேதி ஆகியவற்றை பதிவு செய்ய வேண்டும்.

மேலும் தங்களது புகைப்படத்தையும் ஸ்கேன் செய்து விண்ணப்பத்தில் பதிவேற்றம் செய்ய வேண்டும். அல்லது மாவட்ட தாட்கோ அலுவலகத்தில் ரூ. 20 செலுத்தி விண்ணப்பத்தைப் பெற்று பூர்த்தி செய்து அந்த அலுவலகத்திலும் விண்ணப்பிக்கலாம்.

தடம்புரண்டது திருச்சி-பாலக்காடு ரயில்: ஈரோடு அருகே திடீர் பரபரப்பு

ஈரோடு ரயில் நிலையத்துக்கு சற்று தூரத்துக்கு முன்பு திருச்சி-பாலக்காடு ரயில் செவ்வாய்க்கிழமை தடம் புரண்டதால் திடீர் பரபரப்பு ஏற்பட்டது.

திருச்சி-பாலக்காடு பயணிகள் ரயில் (வண்டி எண்: 56847) திருச்சியில் இருந்து புதன்கிழமை பகல் 1 மணிக்கு புறப்பட்டது. சுமார் 3.55 மணி அளவில் ஈரோடு ரயில் நிலையத்துக்கு முன்பு 100 மீ தொலைவில் வந்தபோது இந்த ரயில் ரயில் நிலையத்தின் 2-வது பிளாட்பாரத்துக்குச் செல்லும் பாதைக்கு தடம் மாறியது.அப்போது திடீரென ரயில் இன்ஜீனும், முதல் பெட்டியும் தடம் புரண்டு கீழே சாய்ந்தன. இதையடுத்து ரயிலை ஓட்டுநர் உடனடியாக நிறுத்தினார். ரயில் தடம் புரண்டதை பார்த்த பயணிகள் அலறியடித்து ரயில் பெட்டிகளில் இருந்து கீழே குதித்து தப்பினர்.

தகவல் அறிந்த ரயில்வே பாதுகாப்புப்படையினர், ரயில்வே போலீஸார் மற்றும் ரயில்வே அதிகாரிகள் சம்பவ இடத்துக்குச் சென்று தீவிர விசாரணையில் ஈடுபட்டனர்.மீட்பு ரயில் கொண்டுவரப்பட்டு தடம் புரண்ட பயணிகள் ரயில் எடுத்துச்செல்லப்பட்டது.

இந்த ரயில் தடம் புரண்டதால் ஈரோட்டில் இருந்து மாலை 6.20-க்கு புறப்பட வேண்டிய ஈரோடு-ஜோலார்பேட்டை பயணிகள் ரயில் சற்று காலதாமதமாக சென்றது.இதனால் கரூர், திருச்சி மார்க்கமாக செல்லும் பிற ரயில்களின் சேவை பாதிக்கப்படும் என்றும் சென்னை-கோவை, கோவை-சென்னை மார்க்கமாக செல்லும் ரயில் சேவை பாதிக்கப்படாது என்றும் ரயில்வே அதிகாரிகள் தெரிவித்தனர்.

கேரளத்தில் தமிழர்கள் நிலங்கள் பறிப்பு: கருணாநிதி கண்டனம்

கேரளத்தில் தமிழர்களின் நிலங்கள் பறிக்கப்படுவதற்கு திமுக தலைவர் கருணாநிதி கண்டனம் தெரிவித்துள்ளார்.

இது தொடர்பாக செவ்வாய்க்கிழமை அவர் வெளியிட்ட அறிக்கை:-

இலங்கையில் இருந்துதான் தமிழர்களை வெளியேற்றும் நடவடிக்கை தொடருகிறது என்றால், ஒரே இந்தியாவிலுள்ள கேரளத்திலும் தமிழர்களை வெளியேற்றும் நடவடிக்கை என்பது அதிர்ச்சியைத் தருகிறது.

கேரள மாநிலம் அட்டப்பாடியில் தமிழர்கள் விவசாயம் செய்து வருகின்ற நிலங்கள், பழங்குடி இன மக்களுக்குச் சொந்தமானவை என்றும், பழங்குடியினரின் நிலங்கள், அவர்களுக்கே சொந்தம் என்ற உச்ச நீதிமன்றத் தீர்ப்பின்படி தமிழர்கள் தங்களின் நிலங்களை பழங்குடியினரிடமே ஒப்படைக்க வேண்டுமென்றும் கேரள அரசு கூறுகிறது.

பழங்குடியின மக்களுக்குச் சொந்தமான நிலங்களை தமிழர்கள் ஆக்கிரமிக்கவில்லை.

கேரள அரசில் பணியாற்றும் சில அதிகாரிகள் தமிழர்களிடமிருந்து அந்த நிலங்களைப் பெற்று, பழங்குடியின மக்களிடம் திரும்ப ஒப்படைக்கிறோம் என்ற பெயரால், அவற்றை ஒருசில பெரிய நிறுவனங்களுக்குத் தாரை வார்க்கும் முயற்சியில்தான் சில நடவடிக்கைகளில் ஈடுபடுவதாகத் தெரிகிறது.

அதே கேரளாவில் மேற்குத் தொடர்ச்சி மலையை ஒட்டியுள்ள பகுதிகளில் உள்ள பழங்குடியினருக்குச் சொந்தமான 28 ஆயிரம் ஏக்கர் நிலங்களையெல்லாம் ஒரு சில பன்னாட்டு நிறுவனங்கள் பறித்துக் கொண்டிருக்கின்றன.

அந்த நிலங்களைத் திரும்பப் பெற்று பழங்குடி இன மக்களுக்கு மீண்டும் வழங்க முயற்சி எடுக்காத கேரள அரசு, தமிழர்கள் வாழும் பகுதியிலே உள்ள நிலங்களை மட்டும் பறிக்க முயற்சிப்பது நியாயமான செயல் அல்ல.

எனவே தமிழக அரசு இந்தப் பிரச்சினை குறித்து உடனடியாகக் கவனித்து, கேரள அரசுடனும், மத்திய அரசுடனும் தொடர்பு கொண்டு உரிய நடவடிக்கை எடுத்து அட்டப்பாடியில் காலம் காலமாக இருந்து வரும் தமிழர்களைக் காப்பாற்றிட முன்வரவேண்டும் என்று அவர் கூறியுள்ளார்.

காவல்துறை வாகனம் மீது தாக்குதல்: இந்து முன்னணியினர் கைது

சென்னை அயனாவரத்தில் காவல்துறை வாகனம் மீது தாக்குதல் நடத்தி, கண்ணாடியை உடைத்ததாக இந்து முன்னணியினர் கைது செய்யப்பட்டனர்.

அயோத்தியில் ராமர் கோயில் கட்டக் கோரி இந்து முன்னணி அமைப்பின் சார்பில்  அயனாவரம் சந்திப்பில் கடந்த 6-ம் தேதி காவல்துறை அனுமதியின்றி ஆர்ப்பாட்டம் நடைபெற்றது. இந்த ஆர்ப்பாட்டம் அனுமதியின்றி நடைபெற்றதால் போராட்டத்தில் பங்கேற்றோரை போலீஸார் கைது செய்ய முயன்றனர்.அப்போது போலீஸôருக்கும், அந்த அமைப்பினருக்கும் இடையே தள்ளுமுள்ளு ஏற்பட்டது. இதில் அந்த அமைப்பினரை போலீஸார் கைது செய்து போலீஸ் வேனில் ஏற்றினர்.போலீஸ் வேனில் ஏற்றப்பட்ட அந்த அமைப்பினர்,  வேனின் கண்ணாடியை அடித்து உடைத்தனர்.

இது குறித்து அயனாவரம் போலீஸார் வழக்குப் பதிவு செய்து, விசாரணை செய்தனர். இந்நிலையில் இது தொடர்பாக இந்து முன்னணி நிர்வாகிகள் ஓட்டேரியைச் சேர்ந்த ஆபேல்ராஜ் (29), அதேப் பகுதியைச் சேர்ந்த கங்காதரன் (20) ஆகிய இருவரையும் போலீஸார் கைது செய்தனர். இது தொடர்பாக மேலும் சிலரை போலீஸார் தேடி வருகின்றனர்.  கைது செய்யப்பட்ட கங்காதரன் அண்ணாநகரில் உள்ள ஒரு கல்லூரியில் படித்து வருகிறார்.

தமிழகத்தில் பூரண மதுவிலக்கு: மாநில ஜமாத்துல் உலமா சபை கோரிக்கை

தமிழகத்தில் பூரண மதுவிலக்கை அமல்படுத்த வேண்டும் என மாநில ஜமாத்துல் உலமா சபை செயற்குழுக் கூட்டத்தில் செவ்வாய்க்கிழமை வலியுறுத்தப்பட்டது.

அம்பாசமுத்திரத்தில் முகைதீன் கீழபள்ளிவாசலில் நடைபெற்ற இக்கூட்டத்துக்கு அமைப்பின் மாநிலத் தலைவர் ஏ.இ.எம். அப்துல்ரகுமான் தலைமை வகித்தார்.

திருநெல்வேலி மாவட்டத் தலைவர் டி.ஜெ.எம். ஸலாஹூதீன், மாவட்டச் செயலர் எம்.எச். ஷம்சுத்தீன், மாவட்டப் பொருளாளர் ஏ.ஒய். முகைதீன், அம்பாசமுத்திரம் வட்டார கெளரவத் தலைவர் எம். பீர்முகம்மது முன்னிலை வகித்தனர்.

கூட்டத்தில் சேலம் மாவட்ட நிர்வாகிகள் கலிலூர்ரஹ்மான், அபுதாஹீர், கோவை மாவட்ட நிர்வாகி சுல்தான், கவிஞர் தேங்கை ஷரிபுதீன், சென்னை மாவட்ட நிர்வாகி இல்யாஸ், திருச்சி மாவட்ட நிர்வாகி முகம்மதுமீரான், மேலப்பாளையம் அரபிக் கல்லூரி முதல்வர் எஸ்.எஸ். ஹைதர்அலி, திருநெல்வேலி கிழக்கு மாவட்ட அரசு கஸ்சாலி, மேலப்பாளையம் பி.ஏ. காஜாமுகைதீன், புளியங்குடி ஜெ. கலீல்ரஹ்மான், தி. மீராசாஆலிம், பி. அப்துல்ரஹீம் உள்பட 300 க்கும் மேற்பட்டோர் கலந்து கொண்டனர்.

அமைப்பின் மாநில பொதுச்செயலர் எம்.ஓ. அப்துல்காதிர்தாவூதி மறைவுக்கு இரங்கல் தெரிவிக்கப்பட்டது. கூட்டத்தில் தமிழக அரசு பூரண மதுவிலக்கை அமல்படுத்த வேண்டும் என்பன உள்ளிட்ட தீர்மானங்கள் நிறைவேற்றப்பட்டது. அம்பாசமுத்திரம் வட்டாரத் தலைவர் பி. ஷேக்மன்சூர் வரவேற்றார். வட்டாரச் செயலர் எம். முகம்மதுஇஸ்மாயில் நன்றி கூறினார்.

நடிகர் மயில்சாமியை மிரட்டியவர் அடையாளம் தெரிந்தது

தமிழ் திரைப்பட நகைச்சுவை நடிகர் மயில்சாமியை மிரட்டியவரை போலீஸôர் கண்டறிந்தனர்.

தமிழ் திரைப்பட நகைச்சுவை நடிகர் மயில்சாமி, ஞாயிற்றுக்கிழமை மாலை விருகம்பாக்கம் வெங்கடேஸ்வரா நகரில் உள்ள தனது வீட்டில் இருந்தாராம். அப்போது அவர் செல்போனுக்கு ஒரு அழைப்பு வந்ததாம்.அதில் பேசிய நபர், தான் போலீஸ் என்றும், அண்மையில் பாலியல் தொழிலில் ஈடுபட்ட ஒரு கும்பலை பிடித்தபோது, அந்த கும்பலைச் சேர்ந்த சில பெண்கள் மயில்சாமி பெயரை கூறியதாகவும், மேலும் அவர்களிடம் மயில்சாமியின் செல்போன் எண் இருந்ததாகவும் அந்த நபர் தெரிவித்தனராம்.

மேலும் அந்த நபர், பாலியல் தொழில் உள்ளவர்களிடம் மயில்சாமிக்கு இருக்கும் தொடர்பை வெளியே சொல்லாமல் இருப்பதற்கு ரூ. 50 ஆயிரம் வேண்டும் என கேட்டு மிரட்டினாராம்.

இதைக் கேட்டு அதிர்ச்சியைடந்த மயில்சாமி, அந்த நபரிடம் மறுத்து பேசியதாக தெரிகிறது. அப்போது அந்த நபரிடமிருந்து அருகே இருந்த ஒரு பெண்ணும், மயில்சாமியை மிரட்டும் வகையில் செல்போனில் பேசினாராம். பின்னர் இருவரும் செல்போன் இணைப்பை தூண்டித்துவிட்டனராம்.இதனால் அதிர்ச்சியடைந்த மயில்சாமி, விருகம்பாக்கம் காவல் நிலையத்தில் புகார் செய்தார். அந்த புகாரின் அடிப்படையில் போலீஸார் விசாரணை நடத்தினர். விசாரணையில் விருகம்பாக்கம் எழில்நகரைச் சேர்ந்த ஆயிஷா என்ற பெண்ணின் செல்போனில் இருந்தே மயில்சாமிக்கு மிரட்டல் வந்திருப்பது தெரியவந்தது.

இதையடுத்து போலீஸார் அவர் வீட்டுக்கு விசாரணை செய்ய சென்றனர். ஆனால் அந்த பெண் அங்கிருந்து 2 நாள் முன்பே, வீட்டை பூட்டிவிட்டு வெளியே சென்றிருப்பது தெரியவந்தது. இதனால் போலீஸார் அந்த பெண்ணை தேடி வருகின்றனர்.அதேநேரத்தில் கடந்த 10 நாள்களாக மயில்சாமி செல்போனுக்கு யாரெல்லாம் தொடர்பு கொண்டு பேசினர் என்ற தகவலை பெற்றனராம். இதில் மயில்சாமியும் அந்த பெண்ணிடம் 50 முறைக்கு மேல் தொடர்பு கொண்டு பேசியிருப்பது தெரியவந்துள்ளதாம்.

இதனால் போலீஸார் மயில்சாமியிடமும் இது தொடர்பாக விசாரணை நடத்த திட்டமிட்டுள்ளதாக கூறப்படுகிறது.

சிவப்புச் சுழல் விளக்கை பயன்படுத்த கட்டுப்பாடு: உச்ச நீதிமன்றம்

சிவப்புச் சுழல் விளக்கை அரசியல் சாசனத்தின் கீழ் ஏற்படுத்தப்பட்ட பதவி வகிப்பவர்கள், அரசு உயர் அதிகாரிகளின் வாகனங்களில் மட்டுமே பயன்படுத்த வேண்டும் என்று உச்ச நீதிமன்றம் செவ்வாய்க்கிழமை உத்தரவிட்டுள்ளது. இதற்கேற்ப வரும் 3 மாதங்களுக்குள் உரிய சட்டத் திருத்தத்தை கொண்டு வருமாறும் மத்திய அரசைக் கேட்டுக் கொண்டுள்ளது.

சுழல் விளக்கு பொருத்தப்பட்ட வாகனங்கள் தவறாகப் பயன்படுத்தப்படுவதாக உத்தரப்பிரதேசத்தைச் சேர்ந்த அபய்சிங் என்பவர் உச்ச நீதிமன்றத்தில் பொதுநல வழக்கு தொடர்ந்தார்.

இந்த வழக்கை உச்ச நீதிமன்ற நீதிபதி ஜி.எஸ்.சிங்வி தலைமையிலான அமர்வு விசாரணை நடத்தி வருகிறது.

இந்த வழக்கில் உச்ச நீதிமன்றம் செவ்வாய்க்கிழமை அளித்த உத்தரவில், ""சிவப்புச் சுழல் விளக்குகளை அரசியல் சாசனத்தின் கீழ் ஏற்படுத்தப்பட்ட பதவி வகிப்பவர்கள், அரசு உயர் அதிகாரிகளின் வாகனங்களில் மட்டுமே பயன்படுத்த வேண்டும்.

நீல நிறச் சுழல் விளக்குகளை காவல்துறை மற்றும் பிற அவசர வாகனங்களில் மட்டுமே பயன்படுத்தவேண்டும். எனினும், அவை எழுப்பும் ஓசையின் அளவு அதிகமாக இருக்கக் கூடாது'' என்று குறிப்பிட்டிருந்தனர். ""வாகனங்களில் சிவப்பு விளக்கு பொருத்திக் கொள்ளும் தகுதியுடைய முக்கியப் பிரமுகர்களின் பட்டியலை மாநில அரசுகள் தங்கள் விருப்பப்படி விரிவாக்கம் செய்ய முடியாது. இந்த விஷயத்தில், காவல்துறையினர் அச்சமும் பாரபட்சமும் இன்றி கட்டுப்பாடுகளை செயல்படுத்த வேண்டும்'' என்றும் நீதிபதிகள் உத்தரவிட்டனர்.

2ஜி: ஊழலை மறைத்துள்ளார் சாக்கோ

2ஜி அலைக்கற்றை ஒதுக்கீடு முறைகேடு விவகாரத்தில் ஆளும் காங்கிரஸ் கட்சித் தலைவர்களின் தவறுகளை ஜேபிசி குழுத் தலைவர் பி.சி. சாக்கோ மூடி மறைத்துள்ளார் என்று பாஜக ஆட்சிமன்றக் குழுவில் கண்டனம் தெரிவிக்கப்பட்டது.

2ஜி அலைக்கற்றை விவகாரம் தொடர்பாக தில்லியில் செவ்வாய்க்கிழமை பாஜக ஆட்சிமன்றக் குழுக் குழு கூடி விவாதித்தது. நாடாளுமன்ற பாஜக குழுத் தலைவர் எல்.கே. அத்வானி, பாஜக தலைவர் ராஜ்நாத் சிங், மக்களவை எதிர்க்கட்சித் தலைவர் சுஷ்மா ஸ்வராஜ், மாநிலங்களவை எதிர்க்கட்சித் தலைவர் அருண் ஜேட்லி, மூத்த உறுப்பினர்கள் யஷ்வந்த் சின்ஹா, முரளி மனோகர் ஜோஷி, ரவிசங்கர் பிரசாத் உள்ளிட்டோர் கூட்டத்தில் கலந்துகொண்டனர்.

"ஜேபிசி அறிக்கை முழுமையானதாக இல்லை; அதனால், அதை நிராகரிக்க வேண்டும்' என்று மக்களவைத் தலைவர் மீரா குமாரிடம் பாஜக, திமுக, இடதுசாரிக் கட்சிகளின் உறுப்பினர்கள் கடிதம் எழுதி வலியுறுத்தியது குறித்து ஆட்சிமன்றக் குழு விவாதித்தது. இந்த விவகாரத்தில் ஜேபிசி தலைவரின் செயல்பாடு கடும் கண்டனத்துக்குரியது என்று உறுப்பினர்கள் தெரிவித்தனர். இதையடுத்து, வரும் நாள்களில் அவரைக் கண்டித்து நாடாளுமன்றத்தில் பிரச்னை எழுப்ப வேண்டும் என்று பாஜக ஆட்சிமன்றக் குழுக் கூட்டத்தில் தீர்மானிக்கப்பட்டது.

இது தொடர்பாக பின்னர் செய்தியாளர்களிடம் ரவிசங்கர் பிரசாத் கூறியது:

"ஜேபிசி தலைவர் சாக்கோ, 2ஜி அலைக்கற்றை ஒதுக்கீடு தொடர்பான அறிக்கையை காங்கிரஸ் கட்சிக்கு சாதமாகத் தயாரித்துள்ளார். அந்த விவகாரத்தில் தொடர்புடைய மத்திய முன்னாள் அமைச்சர் ஆ. ராசாவை விசாரிக்க வேண்டும் என்று பாஜக, இடதுசாரிக் கட்சிகள் கோரின. ஆனால், அதைக் கவனத்தில் கொள்ளாத சாக்கோ, எதிர்க்கட்சி உறுப்பினர்கள் தெரிவித்த ஆட்சேபக் குறிப்பையும் தனது வசதிக்கு தகுந்தது போல திருத்தியுள்ளார். இதன் மூலம் நாடாளுமன்ற அமைப்பான ஜேபிசி மீது உறுப்பினர்கள் வைத்துள்ள நம்பிக்கையை சாக்கோ தகர்த்துள்ளார். இனி வரும் நாள்களில் தொடர்ந்து இப் பிரச்னையை பாஜக உறுப்பினர்கள் எழுப்பவர்' என்றார்.

அறிக்கை மீது விவாதம் தேவை: ஆ. ராசா நோட்டீஸ்

2ஜி அலைக்கற்றை தொடர்பாக ஜேபிசி தலைவர் பி.சி. சாக்கோ தயாரித்த அறிக்கை குறித்து அவை விதி 193-ன் கீழ் விவாதிக்க வேண்டும் என்று முன்னாள் அமைச்சர் ஆ. ராசா நோட்டீஸ் அளித்துள்ளார்.

இது தொடர்பாக அவர் மக்களவைச் செயலர் பால்சேகருக்கு செவ்வாய்க்கிழமை அனுப்பியுள்ள நோட்டீஸில், "முழுமை பெறாத, முன்னுக்குப் பின் முரணாக ஜேபிசி அறிக்கை அமைந்துள்ளது. போதிய ஆதாரங்கள் இருந்தும் அதை கவனத்தில் கொள்ளாமல், அந்த அறிக்கையை ஜேபிசி தயாரித்துள்ளது. இதன் மூலம் நாடாளுமன்றச் செயல்பாடு மீதான நம்பிக்கை தகர்க்கப்பட்டுள்ளது. அரசியல் காரணங்களுக்காக அந்த அறிக்கை தயாரிக்கப்பட்டுள்ளது. அது குறித்து விவாதிக்க அனுமதிக்க வேண்டும்' என்று நோட்டீஸில் ராசா கேட்டுக் கொண்டுள்ளார். அவரது கோரிக்கையை ஆதரித்து திமுக உறுப்பினர்கள் டி.ஆர். பாலு, டி.கே.எஸ். இளங்கோவன் ஆகியோர் நோட்டீஸில் கையெழுத்திட்டுள்ளனர்.

மைசூர் அரச குடும்ப வாரிசு: ஸ்ரீ கண்டதத்த நரசிம்மராஜ உடையார் காலமானார்

மைசூர் அரச குடும்ப வாரிசு ஸ்ரீகண்டதத்த நரசிம்மராஜ உடையார் (60) பெங்களூருவில் செவ்வாய்க்கிழமை மாரடைப்பால் காலமானார்.

மைசூரை 1399 முதல் 1950-ஆம் ஆண்டு வரை உடையார் பரம்பரையைச் சேர்ந்த மன்னர்கள் ஆட்சி செய்தனர். இவர்களில் கடைசி மன்னரான ஜெயசாம்ராஜ் உடையாரின் இரண்டாவது மனைவி மகாராணி திரிபுரசுந்தரியின் மகனான ஸ்ரீகண்டதத்த நரசிம்மராஜ உடையார் 1953, பிப்ரவரி 23-ஆம் தேதி மைசூரில் பிறந்தார்.

மைசூரில் பள்ளிப் படிப்பையும், உயர் கல்வியை மைசூர் பல்கலைக்கழகத்திலும் படித்தார். கிரிக்கெட்டில் ஆர்வம் உள்ள நரசிம்மராஜ உடையார், 1976-ஆம் ஆண்டு, பிரமோத தேவியை திருமணம் செய்து கொண்டார். இவருக்கு குழந்தைகள் இல்லை.

புகழ் பெற்ற தசரா திருவிழாவின் போது, மன்னர் ஜெயசாம்ராஜ் உடையார் இறந்த பிறகு, 1974-ம் ஆண்டு முதல் அவரது பொறுப்புகளை நரசிம்மராஜ உடையார் கவனித்து வந்தார்.

மைசூர் மக்களவைத் தொகுதி உறுப்பினராக 4 முறை தேர்ந்தெடுக்கப்பட்ட அவர், அண்மையில் கர்நாடக கிரிக்கெட் சங்கத் தலைவராகப் போட்டியிட்டு வெற்றி பெற்றார்.

பெங்களூரு அரண்மனையில் தங்கியிருந்த அவருக்கு, செவ்வாய்க்கிழமை பிற்பகல் 1.40 மணியளவில் மாரடைப்பு ஏற்பட்டது. அதையடுத்து, தனியார் மருத்துவமனைக்கு கொண்டு செல்லும் வழியிலேயே அவர் உயிரிழந்ததாக மருத்துவர்கள் தெரிவித்தனர்.

அவரது உடலுக்கு கர்நாடக ஆளுநர் பரத்வாஜ், மாநில அமைச்சர்கள் கே.ஜே.ஜார்ஜ், யு.டி.காதர் உள்ளிட்டோர் மரியாதை செலுத்தினர். அவரது மறைவையொட்டி, கர்நாடகத்தில் அரசு சார்பில் செவ்வாய், புதன் ஆகிய இரண்டு நாள்களும் துக்கம் கடைப்பிடிக்கப்படுகிறது.

இதையொட்டி, பள்ளி, கல்லூரிகளுக்கு புதன்கிழமை விடுமுறை அறிவிக்கப்பட்டுள்ளது.

பெங்களூருவிலிருந்து மைசூருக்கு அவரது உடல் கொண்டு செல்லப்பட்டு, மன்னர்களின் உடல்கள் அடக்கம் செய்யப்படும் மனுவனத்தில் புதன்கிழமை இறுதிச்சடங்கு நடைபெறுகிறது

காங்கிரஸ், பாஜகவுடன் கூட்டணி இல்லை

தேர்தலில் காங்கிரஸ், பாஜகவுடன் கூட்டணி அமைக்கும் பேச்சுக்கே இடமில்லை; திரிணமூல் காங்கிரஸ் தனித்து போட்டியிடும் என்று அக்கட்சியின் தலைவரும், மேற்கு வங்க மாநில முதல்வருமான மம்தா பானர்ஜி தெரிவித்துள்ளார்.

இதுகுறித்து புது தில்லியில் மம்தா பானர்ஜி செய்தியாளர்களிடம் செவ்வாய்க்கிழமை கூறியது:

ஏற்கெனவே, மத்திய அரசு மீது மக்கள் நம்பிக்கையில்லாத் தீர்மானத்தை வெளிப்படுத்திவிட்டனர். எனவே, ஆந்திரத்தை பிரிக்கும் விவகாரத்தில் மத்திய அரசு மீது நம்பிக்கையில்லாத் தீர்மானம் கொண்டுவர வேண்டிய அவசியம் இல்லை.

சீமாந்திர பகுதி காங்கிரஸ் நாடாளுமன்ற உறுப்பினர்கள் மத்திய அரசுக்கு எதிராக திங்கள்கிழமை கொண்டுவந்துள்ள நம்பிக்கையில்லாத் தீர்மானத்திற்கு, திரிணமூல் காங்கிரஸ் ஆதரவு அளிக்குமா என்ற கேள்விக்கு பதில் அளித்த மம்தா இதனை தெரிவித்தார்.

நாடாளுமன்றத்தில், பாஜக தலைவர் ராஜ்நாத் சிங், அக்கட்சியின் மூத்த தலைவர் எல்.கே.அத்வானி மற்றும் ஓய்.எஸ்.ஆர்.காங்கிரஸ் தலைவர் ஜெகன் மோகன் ரெட்டி ஆகியோரை மம்தா சந்தித்தார்.

இதனிடையே, ஆந்திர பிரிவினைக்கு எதிராக தீர்மானம் கொண்டுவந்துள்ள சீமாந்திரா பகுதி காங்கிரஸ் நாடாளுமன்ற உறுப்பினர்கள் மம்தா பானர்ஜியை சந்தித்து ஆதரவு கோரினர்.

ஆனால், மத்திய அரசை காப்பாற்ற சமாஜவாதி கட்சியும், பகுஜன் சமாஜ் கட்சியும் தயாராக உள்ள நிலையில் தீர்மானத்திற்கு ஆதரவளிக்க இயலாது என்று அவர்களிடம் மம்தா கூறினார்.

இருப்பினும், ஆந்திர பிரிவினைக்கு எதிரான தங்களின் நிலைப்பாட்டிற்கு ஆதரவு அளிப்பதாகவும் அவர்களிடம் மம்தா தெரிவித்தார்.

ஆந்திரத்தை இரண்டாகப் பிரித்து தனித் தெலங்கானா உருவாக்குவதற்கு எதிராக சீமாந்திரா பகுதி காங்கிரஸ் நாடாளுமன்ற உறுப்பினர்கள், தெலுங்கு தேசம் மற்றும் ஓய்.எஸ்.ஆர்.காங்கிரஸார் தனித்தனியே நாடாளுமன்றத்தில் திங்கள்கிழமை நோட்டீஸ் அளித்துள்ளனர்.