'வருமானம் குறைஞ்சிடுச்சோ'... தங்கக் கோயிலில் 'சொர்ணலட்சுமி'க்கு சிறப்புப் பூஜை செய்த த்ரிஷா!

வேலூர்: பட வாய்ப்பு குறைந்து, வருமானம் குறைந்துவிட்டதை நிவர்த்தி செய்ய, வேலூர் தங்க கோயிலில் உள்ள சொர்ணலட்சுமி சிலைக்கு சிறப்புப் பூஜை செய்தார் நடிகை த்ரிஷா.

வேலூரை அடுத்த ஸ்ரீபுரத்தில் உள்ளது பிரபலமான தங்க கோவில். சமீபத்தில் உருவாகியிருந்த இந்த கோயிலுக்கு ஏகப்பட்ட விஐபி விசிட்டர்கள் பக்தர்களாக உள்ளனர்.

இந்தக் கோயிலுக்கு நடிகை த்ரிஷா நேற்று திடீரென வந்தார். அவருடன் தாயார் உமாகிருஷ்ணன் அவரது சித்தி ஆகியோரும் வந்தனர்.

த்ரிஷாவை்க கண்டதும் வழக்கம் போல கோவிலுக்கு வந்திருந்த பக்தர்கள் சாமியை மறந்து, அவரை மொய்க்க ஆரம்பித்தனர்.

த்ரிஷா வருகை முன்கூட்டியே தெரிவிக்கப்பட்டிருந்ததால், அவரை வி.ஐ.பி. வழியில் தரிசனத்துக்கு அழைத்துச் சென்றனர். அங்கு லட்சுமி நாராயணி அம்மனுக்கு சிறப்பு தீபாராதனை நடந்தது. இதில் கலந்து கொண்டு பயபக்தியுடன் சாமி தரிசனம் செய்தார்.

இந்தக் கோயிலை உருவாக்கியவர் 90களின் இறுதியில் இளம் சாமியாராக இருந்த சதீஷ். இப்போது நாராயணி அம்மா என அழைக்கப்படுபவர் இந்த சதீஷ் சாமியார்தான்.

கோவிலில் 70 கிலோ தங்கத்தினால் சொர்ண லட்சுமி சிலை பிரதிஷ்டை செய்யப்பட்டுள்ளது. இதற்கு பக்தர்கள் தங்கள் கைகளால் அபிஷேகம் செய்தால் செல்வம் பெருகும் என்ற நம்பிக்கையை கோயில் நிர்வாகிகள் பரப்பி வைத்துள்ளனர்.

இந்த சொர்ண லட்சுமி சிலைக்கு நடிகை த்ரிஷாவும் தனது கைகளால் அபிஷேகம் செய்து வழிபட்டார். தொடர்ந்து அவரது தாயார் உமாகிருஷ்ணன் அபிஷேகம் செய்தார்.

கோவில் சார்பில் த்ரிஷாவுக்கு சிறப்புப் பிரசாதம் வழங்கப்பட்டது. கோயிலை ஒரு முறை அங்குள்ள வாகனம் மூலம் சுற்றிப் பார்த்துவிட்டுக் கிளம்பினார். அவர் போகும் இடங்களுக்கெல்லாம் கூடவே ஓடிச் சென்று பரவசப்பட்டனர் பக்தர்கள்!

நடிகை காம்னா ரகசிய திருமணம் - தொழில் அதிபரை மணந்தார்

தமிழில் அறிமுகமாகி காணாமல் போய், தெலுங்கில் பிரபலமான நடிகை காம்னா ஜெத்மலானிக்கு காதலருடன் ரகசிய திருமணம் நடந்ததாக பரபரப்பு கிளம்பியுள்ளது.

ஜெயம் ரவி ஜோடியாக இதயத் திருடன் படத்தில் நடித்தவர் காம்னா. பின்னர் ஜீவனுடன் மச்சக்காரன், ராகவா லாரன்சுடன் ராஜாதி ராஜா போன்ற படங்களில் நடித்துள்ளார்.

தமிழில் இப்போது அவர் நடிக்காவிட்டாலும் தெலுங்கில் முன்னணி நடிகையாக இருந்தார்.

அவரது இளமைத் தோற்றம் சற்று மங்க ஆரம்பித்ததுபோல, பட வாய்ப்புகளும் குறைந்து போயின.

தெலுங்கு பட உலகினர் அவரை ஓரம் கட்டுவதைப் புரிந்த காம்னா, அவசரமாக தன் காதலரை திருமணம் செய்து கொண்டதாக தகவல் பரவி உள்ளது.

மாப்பிள்ளை பெயர் சுராஜ். பெங்களூர் தொழில் அதிபர். இருவரும் நீண்ட நாட்களாகக் காதலித்து வந்தனர்.

பெற்றோர் சம்மதம் பெற்று இப்போது திருமணம் செய்து கொண்டுள்ளனர். இந்தத் திருமணத்துக்கு திரையுலகினரை அழைக்கவில்லை. காம்னாவுக்கு நெருங்கிய தோழிகளான இரண்டு கதாநாயகிகள் மட்டும் கலந்து கொண்டார்களாம்.

ரகசிய திருமணத்தை விரைவில் அதிகாரப்பூர்வமாக அறிவிக்கப் போகிறாராம்.

ஒரு கோடியெல்லாம் இல்லை... கன்னடத்தில் த்ரிஷா சம்பளம் ரூ 25 லட்சம்தான்!

புனித் ராஜ்குமார் ஜோடியாக நடிக்கும் த்ரிஷாவுக்கு சம்பளம் ரூ 25 லட்சம்தான் என தகவல் வெளியாகியுள்ளது.

நடிகை திரிஷா முதல் முறையாக கன்னடத்தில் அறிமுகமாகிறார். தெலுங்கில் வெளியான தூக்குடு படத்தின் கன்னட ரீமேக்கில் நடிக்கும் அவர், அந்தப் படத்தின் சம்பளமாக ரூ 1 கோடி வரை கேட்டுள்ளார்.

ஆனால் கன்னடத்தில் ஒரு படத்தின் பட்ஜெட்டே அவ்வளவுதான். எனவே த்ரிஷாவுக்கு இந்தப் படத்தில் நடிக்க ரூ.20 லட்சம் சம்பளம் பேசினர்.

கன்னடப் பட உலகில் தன் மார்க்கெட் மதிப்பு அதிகமாக வேண்டும் என்றால் முதல் படம் பெரும் வெற்றி பெற வேண்டும். எனவே ரூ 25 லட்சத்துக்கு நடிக்க ஒப்புக் கொண்டாராம் த்ரிஷா.

திரையுலகுக்கு வந்து பத்து ஆண்டுகளானாலும், இப்போதுதான் முதல் முறையாக கன்னடத்தில் நடிக்கிறார்.

மலையாளத்தில் இதே சம்பளத்தில் இரு ஆண்டுகளுக்கு நடிக்க த்ரிஷாவை அழைத்திருந்தார் இயக்குநர் ப்ளெஸ்ஸி. ஆனால் அப்போது சம்பளம் குறைவு என்று கூறி நடிக்க மறுத்துவிட்டார் த்ரிஷா என்பது குறிப்பிடத்தக்கது.

பாலச்சந்தரின் தீவிர ரசிகன் நான் - ஆமீர்கான்

கே பாலச்சந்தரின் தீவிர ரசிகன் நான். அவரது ஏக் துஜே கேலியே பார்த்து வியந்திருக்கிறேன் என்று நடிகர் ஆமீர்கான் கூறினார்.

சென்னை திரைப்பட விழாவை தொடஹ்கி வைக்க இரு தினங்களுக்கு முன்பே சென்னை வந்தார் ஆமீர்கான்.

பின்னர் கமல்ஹாஸனை அவரது வீட்டில் சந்தித்துப் பேசினார் ஆமீர். இரவு அங்கேயே தங்கினார்.

காலையில் இயக்குநர் பாலசந்தர் வீட்டுக்குச் சென்றார். அங்கு பாலசந்தரை சந்தித்து ஆசி பெற்றார். இருவரும் நீண்ட நேரம் பேசிக் கொண்டிருந்தனர்.

தமிழ், இந்தி பட உலகம் பற்றி கலந்துரையாடினார்கள். அதன் பிறகு பாலசந்தரிடம் விடை பெற்றுக் கொண்டு அமீர்கான் புறப்பட்டார்.

பாலசந்தரை சந்தித்தது குறித்து அமீர்கான் கூறுகையில், "இந்திய திரையுலகில் முக்கிய இடம் வகிக்கும் சாதனையாளர் பாலசந்தர். பல நட்சத்திரங்களை உருவாக்கியவர்.

இந்தியில் அவர் இயக்கிய ஏக் துஜே கேலியே படம் பார்த்து வியந்தேன். தாதா சாகேப் பால்கே விருது பெற்றுள்ள அவரது தீவிர ரசிகன் நான்,'' என்றார்.

'தொடர்ந்து குத்தாட்டத்துக்குதான் கூப்பிடறாங்க...' - ப்ரியா மணியின் ஆதங்கம்

தொடர்ந்து குத்தாட்டம் ஆடத்தான் கூப்பிடறாங்க.. நல்ல ஹீரோயின் ரோல் மட்டும் கிடைக்கவே மாட்டேங்குதே என ஆதங்கத்தைக் கொட்டியுள்ளார் நடிகை  

சமீபத்தில் கன்னடத்தில் அவர் நடித்த சாருலதா படத்தை தமிழில் டப்பிங் செய்து வெளியிட்டனர். படம் வந்த சுவடே தெரியவில்லை.

அவர் போடும் கண்டிஷன்கள், தன் பாத்திரம் இப்படித்தான் இருக்க வேண்டும் என இயக்குநர்களைப் படுத்துவது போன்ற காரணங்களால் அவரை தமிழ் சினிமா கண்டு கொள்ளாமல் விட்டுவிட்டது.

தற்போது கன்னடம், மலையாளப் படங்களில் நடித்து வருகிறார். தமிழ் படங்களில் நடிக்காதது ஏன் என்று பிரியா மணியிடம் கேட்டபோது, "தமிழ் படங்களில் நல்ல கேரக்டர்கள் வரவில்லை. சாருலதா படத்துக்கு பிறகு என்னை திருப்திபடுத்தும் கேரக்டர்கள் எதுவும் அமையவில்லை. இதனால் நடிக்கவில்லை.

  

மலையாளத்தில் 'ட்ரூ ஸ்டோரி' என்ற படத்தில் நடிக்கிறேன். உண்மை சம்பவத்தை மையமாக வைத்து இப்படத்தை எடுக்கின்றனர். கன்னடத்தில் அம்பரீஷா என்ற படத்திலும் நடிக்கிறேன்.

சென்னை எக்ஸ்பிரஸ் இந்தி படத்தில் குத்தாட்டம் ஆடியதை தெடர்ந்து நிறைய இந்திப் படங்களில், குத்தாட்டம் போடவே கூப்பிடுகிறார்கள். நான் ஏற்றுக் கொள்ளவில்லை. நல்ல கதையம்சம் உள்ள படமாக இருந்தால் ஆடுவேன். ஆனால் அமீர்கான், ஷாருக்கான், சல்மான்கான், ஹிருத்திக் ரோஷன் படங்களில் ஆட வாய்ப்பு கிட்டினால் ஆடுவேன். அந்தப் படங்களின் கதை எப்படியிருந்தாலும் கவலையில்லை," என்றார்.

செல்வராகவனின் அடுத்த பட ஹீரோ... எல்லோரும் எதிர்ப்பார்த்தது போல தனுஷ் இல்லை... சிம்பு!

இந்தப் படத்தினை வருண் மணியன் தயாரிக்கின்றார். நடிகர் சிம்புவும், இயக்குனர் செல்வராகவனும் இணைந்து இந்தத் திட்டத்தினை தேர்வு செய்துள்ளபோதிலும் இதற்கான அதிகாரப்பூர்வ அறிவிப்பு இன்னும் வெளியாகவில்லை.

சகோதரர் தனுஷுடன் இணைந்து இவர் சில படங்களைத் தயாரித்திருந்தாலும், இப்போது முதன்முறையாக அவர் நடிகர் சிம்புவை இயக்க உள்ளார்.

இந்தப் படத்தின் பிற கலைஞர்கள் மற்றும் தொழில்நுட்பக் கலைஞர்கள் இன்னும் முடிவு செய்யப்படவில்லை என்று தகவல்கள் தெரிவிக்கின்றன.

இந்தப் படத்திற்கான திரைக்கதை அமைப்புகளில் தற்போது செல்வராகவன் ஈடுபட்டுள்ளார்.

முறையான ஒப்பந்தம் கையெழுத்திடப்பட்டதும் இப்படத்தின் படப்பிடிப்பு தொடங்கும். சிம்பு தற்போது கவுதம் மேனன், பாண்டிராஜ் மற்றும் ஏற்கெனவே இழுபறியில் உள்ள வாலு படங்களை முடிக்க வேண்டியுள்ளது.

இவற்றை முடித்த பிறகு செல்வராகவன் படத்துக்கு வருகிறார்.

செல்வராகவன் படங்கள் அறிவிக்கப்பட்டாலும், அவை முடியும் வரை எதுவும் நிச்சயமில்லை. இதற்கு முன் அறிவிக்கப்பட்ட நான்கு படங்கள் படப்பிடிப்பு தொடங்கிய நிலையில் கைவிடப்பட்டுள்ளன. விக்ரம், தனுஷ், ராணா போன்ற நடிகர்களை வைத்து ஷூட்டிங் ஆரம்பிக்கப்பட்ட நிலையில் இந்தப் படங்கள் கைவிடப்பட்டது நினைவிருக்கலாம்.

ஜன்னல் ஓரம் படத்தை டிவியில் ஒளிபரப்ப தடை!

கரு பழனியப்பன் இயக்கத்தில் வெளியாகியுள்ள ஜன்னல் ஓரம் படத்தை டிவியில் ஒளிபரப்ப நீதிமன்றம் தடை விதித்துள்ளது.

விமல், விதார்த், பூர்ணா நடித்த ஜன்னல் ஓரம் படம் சமீபத்தில் ரிலீசானது. இப்படத்தை கருபழனியப்பன் இயக்கி இருந்தார். கே.முருகன் தயாரித்து இருந்தார்.

இந்த படத்தை எதிர்த்து தயாரிப்பாளர் டி.டி.ராஜா, என். செந்தில்பிரபு ஆகியோர் உயர்நீதிமன்றத்தில் வழக்கு தொடர்ந்தனர். ஜன்னல் ஓரம் பட தயாரிப்பாளர் கே.முருகன் பட செலவுக்காக ரூ.93 லட்சம் கடன் வாங்கி இருந்தார் என்றும் படம் ரிலீசுக்கு முன் திருப்பி தருவதாக உறுதி அளித்துவிட்டு பணத்தை கொடுக்காமலேயே படத்தை வெளியிட்டு விட்டார் என்றும் மனுவில் குறிப்பிட்டு இருந்தனர்.

பிரசாத் பிலிம் லேப்பில் உறுதிமொழி பத்திரம் பெற்று இருந்தோம். அதுவும் மீறப்பட்டு உள்ளது என்றும் மனுவில் கூறினர்.

எனவே படத்தை டி.வி.யில் ஒளி பரப்ப தடை விதிக்க வேண்டும் என்று மனுவில் வற்புறுத்தினர். இந்த வழக்கை விசாரித்த நீதிபதி ஜன்னல் ஓரம் படத்தை டிவியில் ஒளிபரப்ப இடைக்கால தடைவிதித்து உத்தரவிட்டார்.

இந்தியில் கால்பதிக்க நேரம் பார்க்கும் சூர்யா- சோதனை முயற்சியாக வரும் மாற்றான் டப்பிங்

இந்திப் பட உலகில் கால்பதிக்க தயாராகிறார் நடிகர் சூர்யா. அதற்கு முன் முயற்சியா தனது மாற்றான் படத்தின் இந்தி டப்பிங்கை வெளியிடுகிறார்.

பாலிவுட்டுக்கு சூர்யா ஒன்றும் புதியவரல்ல. ஏற்கெனவே ராம்கோபால் வர்மாவின் ரக்தசரித்திரா மூலம் அவர் அறிமுகமானவரே.

ஆனால் அந்தப் படம் படுதோல்வியைச் சந்தித்ததும், தனது தமிழ் -தெலுங்கு மார்க்கெட்டைத் தக்கவைத்துக் கொள்வதில் குறியாக இருந்தார். புதிதாக கேரள சினிமா ரசிகர்களும் சூர்யாவுக்கு வந்தனர்.

சூர்யாவின் சிங்கம் 2 தமிழ்நாட்டைப் போலவே கேரளாவிலும் சூப்பர் ஹிட்டானது.

இப்போது மீண்டும் பாலிவுட்டை ஒரு கை பார்க்க வேண்டும் என்ற ஆசை வந்திருக்கிறது சூர்யாவுக்கு. காரணம், அவரது தமிழ்ப் படங்கள் பலவற்றையும் இந்தியில் ரீமேக் செய்து வெற்றி பெறுவதுதான். கஜினி, சிங்கம் போன்றவற்றின் இந்தி ரீமேக் வெற்றி குறிப்பிடத்தக்கது.

சமீபத்தில் சூர்யாவின் சிங்கம் 2, மெய்ன் ஹூன் சூர்யா - சிங்ஹம் 2 என்ற தலைப்பில் வெளியாகி, ஓரளவு நன்றாகவும் ஓடியது.

இப்போது அடுத்ததாக தமிழில் தோல்வி கண்ட சூர்யாவின் மாற்றான் படத்தை இந்தியில் டப் செய்து நம்பர் 1 - ஜூத்வா - தி அன்பிரேக்கபிள் என்ற தலைப்பில் வெளியிடுகின்றனர்.

மாற்றான் படத்தை கேவி ஆனந்த் இயக்கியிருந்தார். காஜல் அகர்வால் சூர்யாவுக்கு ஜோடியாக நடித்திருந்தார்.

இந்தப் படத்துக்குக் கிடைக்கும் வரவேற்பைப் பொருத்து சூர்யா தன் நேரடி இந்திப் படம் குறித்து முடிவெடுக்கப் போகிறார்.

புதியவர்களே, வாருங்கள்... நான் இருக்கிறேன்! - இளையராஜா

புதியவர்களுக்கு என்றுமே நான் இசையமைக்க மறுத்ததில்லை. புதியவர்களே வாருங்கள் நான் இருக்கேன், என்று இளையராஜா பேசினார்.

விக்னேஷ் புரொடக்ஷன்ஸ் என்ற படநிறுவனம் சார்பாக பி.வேலுச்சாமி தயாரிக்கும் படம் 'ஒரு ஊர்ல'.

இந்த படத்தின் இசை வெளியீட்டு விழா இன்று காலை பிரசாத் லேபில் நடந்தது. பொதுவாக தான் இசையமைத்த படங்களின் இசை வெளியீட்டுக்களுக்கு கூட போகாத இசைஞானி இளையராஜா, முற்றிலும் புதியவர்கள் உருவாக்கியுள்ள இந்தப் பட இசை விழாவுக்கு வந்திருந்தார்.

விழாவில் பங்கேற்ற தயாரிப்பாளர் சங்க தலைவர் கே.ஆர் பேசுகையில், "என்னை தயாரிப்பாளர் சங்க தலைவர் கே.ஆர். என்று சொல்வதை விட இளையராஜா அவர்களின் ரசிகன் என்று சொல்வதுதான் எனக்கு பெருமை. அவரால் உருவாக்கப்பட்ட இயக்குநர்கள் ஏராளம்.

தமிழ் சினிமாவில் நிறைய தயாரிப்பாளர்கள் நிறைய முதலீட்டில் படங்கள் தயாரிக்கின்றனர். ஆனால் போட்ட பணத்தை எப்படி திருப்பி எடுப்பது என்பது யாருக்கும் புரிய வில்லை. அதற்குத்தான் தயாரிப்பாளர் சங்கம் கூடிய விரைவில் முடிவெடுக்க உள்ளது.

இளையராஜா அவர்கள், தன் பாடல்களுக்கு காப்பி ரைட் சட்டப்படி சம்பாதித்து இருந்தால் பில்கேட்ஸ் அவர்களைவிட அதிகமாக சம்பாதித்து இருப்பார்," என்றார்.

இளையராஜா பேசுகையில், "ஒரு ஊர்ல படத்தை முழுவதும் பார்த்த பிறகுதான் இசையமைத்தேன். ஒவ்வொரு காட்சியும் சிறப்பாக இருந்ததால் என்னால் நிறைவாக இசையமைக்க முடிந்தது.

எந்த படத்திற்கும் நான் மூன்று நாட்களுக்கு மேல் இசையமைத்தது இல்லை. அது நூறு நாள் படமானாலும், வெள்ளி விழா படமானாலும் மூன்று நாட்களுக்கு மேல் என் ஸ்டுடியோவில் அந்த படம் இருந்ததில்லை.

அந்த காலத்திலிருந்தே நிறைய புதுமுக இயக்குனர்களுக்கு எனது பெயர் பயன்பட்டுள்ளது. ஒரு சிலர் என்னிடம் வந்து ஏன் அவர்களுக்கு எல்லாம் ஏன் இசை அமைக்கிறீர்கள்? என்று கேட்பார்கள். அதற்கு 'நான் இசையமைத்து நீ வந்தது மாதிரி, அவனும் வந்து விட்டு போகட்டுமே. உனக்கு உண்டான இடம் உனக்கு... அவனுக்கு உண்டான இடம் அவனுக்கு' என்பேன்.

புதியவர்களுக்கு என்றுமே நான் இசையமைக்க மறுத்ததில்லை. புதியவர்களே வாருங்கள் நான் இருக்கேன்," என்று இளையராஜா பேசினார்.

இந்த விழாவில் கவிஞர் மூ.மேத்தா, இயக்குனர்கள் பாலு மகேந்திரா, பாலாஜி சக்திவேல், ரத்தினகுமார், விஜய்மில்டன், தயாரிப்பாளர் சங்க பொருளாளர் ராதா கிருஷ்ணன் ஆகியோர் பேசினார்கள். படத்தின் நாயகன் வெங்கடேஷ், கதாநாயகி நேஹா பட்டீல், நான்கடவுள் முரளி, பேபி சௌந்தர்யா ஆகியோரும் கலந்து கொண்டனர்.

விழாவிற்கு வருகை தந்த அனைவரையும் படத்தின் தயாரிப்பாளர் வேலுச்சாமி வரவேற்றார். இயக்குனர் கே.எஸ்.வசந்தகுமார் நன்றி தெரிவித்தார்.

தமிழகத்திலும் மாற்றத்தை ஏற்படுத்துவோம்: ஆம் ஆத்மி கட்சி நிர்வாகிகள் பேட்டி

தமிழகத்திலும் மாற்றத்தை ஏற்படுத்துவோம் என, ஆம் ஆத்மி கட்சி நிர்வாகிகள் தெரிவித்துள்ளனர்.

மதுரையில் சனிக்கிழமை நடைபெற்ற மாவட்ட திட்டமிடுதல் கூட்டத்துக்குப் பிறகு, இக் கட்சியின் தேசிய செயற்குழு உறுப்பினரும், மாநில ஒருங்கிணைப்பாளருமான கிறிஸ்டினாசாமி, துணை ஒருங்கிணைப்பாளர் எம். லெனின், மாநிலப் பொருளாளர் ஆனந்த கணேஷ் ஆகியோர் செய்தியாளர்களிடம் கூறியது: 

புதுதில்லி சட்டப்பேரவைத் தேர்தலில் ஆம் ஆத்மி கட்சி வெற்றி பெற்ற பிறகு, இந்திய அளவில் மக்களிடம் எழுச்சி ஏற்பட்டுள்ளது. ஊழலுக்கு எதிராக வெற்றி பெற்றதை ஏராளமானோர் அதிசயத்துடன் விசாரித்து வருகின்றனர்.

இது எங்களுக்கு மேலும் ஊக்கம் அளிப்பதாக உள்ளது. கட்சியில் இணைவதற்கு ஏராளமானோர் விருப்பம் தெரிவித்து வருகின்றனர். இதனால், உறுப்பினர் சேர்க்கையை தீவிரப்படுத்தியுள்ளோம்.

முதலில் மாவட்ட அளவில் தாற்காலிகக் குழுக்கள் அமைக்கப்பட்டு வருகின்றன. மாவட்டக் குழுவினர் ஒன்றிய அளவிலான குழுக்களை ஏற்படுத்துவர். ஒன்றியக் குழுவினர் ஊராட்சி குழுக்களை ஏற்படுத்தவேண்டும். தமிழகத்தில் இதுவரை 14 மாவட்டங்களில் தாற்காலிகக் குழுக்கள் ஏற்படுத்தப்பட்டுள்ளன.

அதேநேரத்தில், பல்வேறு கட்சிகளில் இருந்தும் ஆம் ஆத்மியில் இணைய விருப்பம் தெரிவித்துள்ளனர். புதுதில்லியில் ஆட்சி அமைப்பது தொடர்பான பேச்சுவார்த்தை முடிவு பெற்ற பிறகே, மக்களவைத் தேர்தலில் போட்டியிடுவது குறித்து முடிவு செய்யப்பட உள்ளது. இது தொடர்பாக, 2 நபர் குழு அமைக்கப்பட்டுள்ளது.

அதிகார பரவலாக்கம், நேரிடை ஜனநாயக பங்கேற்பு, மக்களோடு இணைந்து தீர்மானிப்பது போன்ற கட்சியின் கொள்கைகளை அடிப்படையாகக் கொண்டு செயல்படுவோம்.

தமிழகத்தில் திராவிட கட்சிகளுக்கு மாற்றாக, ஆம் ஆத்மி மீது மக்களுக்கு நம்பிக்கை வந்துள்ளது. இந்த வாய்ப்பை விட்டுவிடக்கூடாது என பலரும் எங்களைத் தொடர்பு கொண்டு கூறி வருகின்றனர். தமிழகத்திலும் மாற்றத்தை ஏற்படுத்தத் திட்டங்களை வகுத்து செயல்படுவோம் என்றனர்.

பழனி தைப்பூசத் திருவிழா ஜன. 11இல் கொடியேற்றத்துடன் தொடக்கம்

அறுபடை வீடுகளில் மூன்றாம் படைவீடான பழனியில் தைப்பூசத் திருவிழா வரும் ஜன. 11ஆம் தேதி அன்று கொடியேற்றத்துடன் தொடங்குகிறது.  முக்கிய நிகழ்ச்சியான தைப்பூசத் தேரோட்டம் வரும் ஜன. 17ஆம் தேதியும், தெப்பத் தேரோட்டம் ஜன. 20ஆம் தேதியும் நடைபெறுகிறது.

    முருகப்பெருமானின் அறுபடை வீடுகளில் மூன்றாம் படை வீடாக விளங்கும் பழனியில் ஆண்டு முழுக்க திருவிழா நடைபெற்றாலும் தைப்பூசத் திருவிழாவும், பங்குனி உத்திரத் திருவிழாவும் முக்கிய இடத்தை பெற்றுள்ளன. பழனி தைப்பூசத் திருவிழாவின் போது தமிழகம் மட்டுமன்றி பல்வேறு மாநிலங்களைச் சேர்ந்த லட்சக்கணக்கான பக்தர்கள் பால்காவடி, பன்னீர்காவடி, மயில் பீலிக்காவடி, மலர்க்காவடி என பல்வேறு காவடிகளுடன் பாதயாத்திரையாக வருவார்கள்.

 பக்தர்கள் வருகையை முன்னிட்டு பல இடங்களில் பக்தர்கள் இளைப்பாறும் இடம், குடிநீர் வசதி, தாற்காலிக பேருந்து நிலையம், சுகாதார மையம் உள்ளிட்ட பல்வேறு அடிப்படை வசதிகள் மேற்கொள்ளப்பட்டு வருகின்றன.  இப்பெருமை மிக்க தைப்பூசத் திருவிழா வரும் ஜனவரி 11ஆம் தேதி (சனிக்கிழமை) பழனி அருள்மிகு பெரியநாயகியம்மன் கோயிலில் கொடிக்கட்டி மண்டபத்தில் காலை கொடியேற்றத்துடன் தொடங்குகிறது.  இந்த விழா 10 நாள்கள் நடைபெறும். விழா நாள்களில் அருள்மிகு வள்ளி, தேவசேனா சமேதர் முத்துக்குமாரசாமி தினமும் தங்கமயில், தங்ககுதிரை, வெள்ளியானை, வெள்ளி ஆட்டுக்கிடா, வெள்ளிக்காமதேனு, தந்தசப்பரம் உள்ளிட்ட பல்வேறு வாகனங்களில் நான்கு ரதவீதிகளில் எழுந்தருள்கிறார். வரும் ஜனவரி 16ஆம் தேதி (வியாழக்கிழமை) இரவு முக்கிய நிகழ்ச்சியான திருக்கல்யாணம் மற்றும் வெள்ளிóதேரோட்டம் நடைபெறுகிறது. தொடர்ந்து ஜனவரி 17ஆம் தேதி (வெள்ளிக்கிழமை) மாலை தைப்பூசத் திருத்தேரோட்டம் நடைபெறவுள்ளது.    வரும் ஜனவரி 20ஆம் தேதி (திங்கள்கிழமை) நிறைவு நாள் நிகழ்ச்சியாக இரவு தெப்பத் தேரோட்டமும், நள்ளிரவு திருக்கொடி இறக்கமும் நடைபெறுகிறது. விழா நாள்களில் அடிவாரம் குடமுழுக்கு நினைவரங்கில் பக்தி இன்னிசை நிகழ்ச்சி, பக்தி சொற்பொழிவு, பட்டிமன்றம், பரதநாட்டியம் என பல்வேறு நிகழ்ச்சிகள் நடைபெறுகின்றன.

  விழாவிற்கான ஏற்பாடுகளை பழனிக்கோயில் இணை ஆணையர் (பொறுப்பு) ராஜமாணிக்கம், உதவி ஆணையர் மேனகா, முதுநிலை கணக்கியல் அலுவலர் பழனிச்சாமி மற்றும் பலர் செய்து வருகின்றனர்.

யானைகளால் ரூ. 15 லட்சம் பயிர்கள் சேதம்

கர்நாடக மாநிலம், கோலார் மாவட்டத்தில் ரூ. 15 லட்சம் மதிப்பிலான பயிர்களை யானைகள் சேதப்படுத்தியுள்ளதாக விவசாயிகள் வேதனை தெரிவித்தனர்.

சூளகிரி வனப் பகுதியில் இருந்து கர்நாடக மாநிலம், பங்கார்பேட் வட்டம், காமசமுத்திரம் ஒன்றியத்துக்குள் புகுந்த 35 யானைகள், எரகோல், பட்லஹள்ளி, கம்மனஹள்ளி உள்ளிட்ட கிராமப்புறங்களில் சுற்றித் திரிந்து வருவதோடு, அந்தப் பகுதியில் உள்ள வயல்களில் புகுந்து பயிர்களை நாசப்படுத்தி வருகின்றன. இதனால், அந்தப் பகுதிகளில் ரூ. 15 லட்சத்திற்கும் அதிகமான பயிர்கள் நாசமாகியுள்ளதாக வனத் துறை அதிகாரிகள் மதிப்பிட்டுள்ளனர்.

ஈரோடு-பழனி ரயில் திட்டம் சாத்தியமில்லை: தெற்கு ரயில்வே பொதுமேலாளர்

ஈரோடு-பழனி ரயில் திட்டம் சாத்தியமில்லை என்று தெற்கு ரயில்வே பொதுமேலாளர் ராகேஷ் மிஸ்ரா கூறினார்.

ஈரோடு ரயில்வே மருத்துவமனை அருகே, துணை மண்டல ரயில்வே மருத்துவமனை அமைப்பதற்கான அடிக்கல் பெயர்ப் பலகையை வெள்ளிக்கிழமை திறந்துவைத்த அவர் செய்தியாளர்களுக்கு அளித்த பேட்டி:

ஒவ்வொரு ஆண்டும் முக்கிய ரயில் நிலையங்களில் ஆய்வு நடத்தப்படுவது வழக்கம். கோவை முதல் சேலம் வரையிலான ரயில் நிலையங்களில் வெள்ளிக்கிழமை ஆய்வு நடத்தப்பட்டது. ஈரோடு ரயில்வே காலனியில் துணைக் கோட்ட ரயில்வே மருத்துவமனை அமைக்க அடிக்கல் நாட்டப்பட்டுள்ளது.

ஈரோடு ரயில் நிலையத்தில் 2 எஸ்கலேட்டர்கள் (நகரும் படிகட்டுகள்), 2 லிஃப்ட்கள் அமைப்பதற்கான உபகரணங்கள் கொள்முதல் செய்யும் பணி இப்போது நடந்து வருகிறது. மாற்றுத்திறனாளிகள், முதியோர்கள் ரயில்களில் இருந்து இறங்கி ரயில் நிலையத்தின் கீழ் பகுதிக்கு வர வசதியாக பேட்டரி கார், நன்கொடை மூலமாகப் பெற்று இயக்கப்படும்.

ஈரோடு-பழனி ரயில் திட்டம் குறித்து ஆய்வுப் பணிகள் நடந்ததில் எதிர்மறை முடிவுகள் தான் கிடைத்துள்ளன. ஈரோடு-பழனி இடையே ரயில்வே துறைக்கு லாபம் கிடைக்கும் அளவுக்கு பயணிகளின் போக்குவரத்து இல்லை. எனவே, ஈரோடு-பழனி ரயில் திட்டம் சாத்தியமில்லை. இத்திட்டத்தை ரயில்வே துறை நிறுத்திவைத்துள்ளது.

வெண்டிபாளையம் ரயில்வே மேம்பாலம் அமைக்க இப்போது போதிய நிதி இல்லை. நிதி வசதி கிடைத்தவுடன் மேம்பாலம் அமைக்கப்படும் என்றார்.

பேட்டியின்போது, சேலம் கோட்ட ரயில்வே பொதுமேலாளர் சுஜாதா ஜெயராஜ், அதிகாரிகள் உடன் இருந்தனர்.

முழு கண்காணிப்பில் ஸ்ரீவிலி. ஆண்டாள் கோயில்: 40 கண்காணிப்பு கேமிராக்கள் அமைப்பு

தீவிரவாதிகளின் மிரட்டல் உள்ள விருதுநகர் மாவட்டம், ஸ்ரீவில்லிபுத்தூர், ஸ்ரீஆண்டாள் கோயில் மற்றும் சுற்றுப் பகுதியை முழுவதும் கண்காணிக்க 40 கண்காணிப்பு கேமிராக்கள் பொருத்தப்பட்டு, 24 மணி நேரமும் தீவிர கண்காணிப்பு முடுக்கி விடப்பட்டுள்ளதாக கோயில் தக்கார் கே.ரவிச்சந்திரன் தெரிவித்தார்.

ஸ்ரீ ஆண்டாள் கோயிலுக்கு அடிக்கடி வெடிகுண்டு மிரட்டல் வருவதாலும், தீவிரவாதிகளின் மிரட்டல் உள்ளதாலும் கோயில் சுற்றுப்புறத்தில் உள்ள மரங்கள் அனைத்தும் அண்மையில் வெட்டப்பட்டன.

மேலும், தமிழக அரசின் முத்திரைச் சின்னமாக உள்ள ஸ்ரீவடபத்ரசயனர் கோயில் ராஜகோபுரம், கோயிலின் தேர் ஆகியவற்றுக்கு 24 மணி நேரமும் துப்பாக்கி ஏந்திய போலீஸ் பாதுகாப்பு போடப்பட்டுள்ளது.

பாதுகாப்பைப் பலப்படுத்துவது குறித்து சென்னையிலிருந்து உயர் போலீஸ் அதிகாரிகள் வந்து ஆய்வு மேற்கொண்டனர். அவர்களின் ஆலோசனையின் பேரில், கூடுதலாக மெட்டல் டிடெக்டர் கருவிகள் அமைப்பது, கண்காணிப்பு கேமிராக்கள் பொருத்துவது என்று கோயில் நிர்வாகம் முடிவு செய்தது.

இதன்பேரில், ராஜகோபுரம் நுழைவு வாயில், ஆடிப்பூர மண்டபம், ஸ்ரீஆண்டாள் பிறந்த நந்தவனம், ஆண்டாள் கோயில் சன்னதி, கடை வீதி, ஆண்டாள் கோயில் நுழைவு வாயில், கொடிமரம், சுற்றுப் பிரகாரங்கள், கண்ணாடி மாளிகை முன்புறம், சக்கரத்தாழ்வார் சன்னதி, வடபத்ரசயனர் கோயில் படிக்கட்டுகள், பகல்பத்து மண்டபம் என 40 இடங்களில் கண்காணிப்பு கேமிராக்கள் பொருத்தப்பட்டுள்ளன.

இதனைக் கண்காணிக்க தக்கார் அறை, செயல் அலுவலர் அறை, போலீஸ் புறக்காவல் நிலையம் ஆகிய இடங்களில் தொலைக்காட்சி பெட்டிகள் வைக்கப்பட்டுள்ளன.

கேமராக்கள் எதிர் எதிர் திசையில் பொருத்தப்பட்டுள்ளதால், கோயிலுக்குள் வருபவர்கள் முகம் தெளிவாகத் தெரியும். இதன்மூலம் கோயிலின் அனைத்துப் பகுதிகளும் போலீஸாரின் தீவிர கண்காணிப்பில் வந்துள்ளது என்றார் தக்கார் ரவிச்சந்திரன்.

நாகையில் மீனவர்கள் வேலைநிறுத்தம்: மீன்வரத்து குறைந்தது

நாகை மீனவர்களை இலங்கைக் கடற்படையினர் சிறை பிடித்ததைக் கண்டித்து, மற்ற மீனவர்கள் 4-வது நாளாக சனிக்கிழமையும் வேலைநிறுத்தத்தில் ஈடுபட்டனர். இதனால், மீன்வரத்து குறைந்துள்ளது.

நாகையிலிருந்து கடலுக்குள் மீன் பிடிக்கச் சென்ற 110 மீனவர்களை இலங்கைக் கடற்படையினர் கடந்த புதன்கிழமை கைது செய்ததைக் கண்டித்தும், நீதிமன்ற காவலில் அடைக்கப்பட்டுள்ள மீனவர்களையும், அவர்களின் விசைப் படகுகளையும் விடுவிக்க மத்திய, மாநில அரசுகள் நடவடிக்கை எடுக்கக் கோரியும், அக்கரைப்பேட்டை மீனவர்கள் புதன்கிழமை முதல் வேலைநிறுத்தத்தில் ஈடுபட்டுள்ளனர்.

4-வது நாளாக சனிக்கிழமையும் வேலைநிறுத்தம் தொடர்ந்தது. இதனால், மீன்வரத்து குறைந்திருந்தது.

"மாதி' புயலால் கடலில் ஏற்பட்ட சீற்றம் காரணமாக, கடந்த சில நாள்களாக மீன்பிடிப்புக்குச் செல்லாமலிருந்த மீன்பிடி பைபர் படகுகள் தற்போது மீன்பிடிப்பைத் தொடங்கியுள்ளதால் உள்ளூர் சந்தைக்கான மீன் வரத்தில் பெரியளவில் மாற்றம் இல்லை. எனினும், வெளியூர்களுக்கு அனுப்பப்படும் மீன்களின் அளவு குறைந்துள்ளது.

ஊழலுக்கு எதிராக தனிக்குழு: இளைஞர்களுக்கு ஸ்ரீ ஸ்ரீரவிசங்கர் அழைப்பு

ஊழலை எதிர்க்க இளைஞர்கள் ஒன்று சேர வேண்டும். இதற்கென வாழும் கலை மையத்தில் ஊழலுக்கு எதிரான குழு ஏற்படுத்த தயாராக இருப்பதாக அதன் நிறுவனர் ஸ்ரீ ஸ்ரீ ரவிசங்கர் கூறினார்.

மதுரையில் வாழும் கலை மையம் சார்பில் தமிழ்நாடு தொழில் வர்த்தக சங்க அரங்கில் சனிக்கிழமை நடைபெற்ற பக்தர்களுடனான நேருக்கு நேர் நிகழ்ச்சியில் அவர் பேசியது:

வன்முறை, பெண்களுக்கெதிரான குற்றங்கள் அதிகரிப்பதற்கு மதுப்பழக்கம் தான் முக்கியக் காரணம். மதுவிலக்கை அமல்படுத்துவதும், மதுவால் தீய செயல்களுக்கு அடிமையானவர்களுக்கு தியானப் பயிற்சியின் மூலம் மன மாற்றத்தை ஏற்படுத்துவதும் இன்றைய சூழலுக்கு மிகவும் அவசியமானது. அடுத்ததாக, ஊழல் என்பது வளர்ச்சிக்கு மிகப் பெரும் தடையாக இருக்கிறது. இவற்றையெல்லாம் இளைஞர்கள் எதிர்க்க வேண்டும். ஊழலுக்கு எதிராக இளைஞர் ஒன்றிணைந்தால், அதற்கென தனிப் பிரிவை வாழும் கலை மையம் ஏற்படுத்தும் என்றார்.

நள்ளிரவில் தீ விபத்து: 12 பாத்திரக் கடைகள் எரிந்து சேதம்

திருவண்ணாமலையில் வெள்ளிக்கிழமை நள்ளிரவு ஏற்பட்ட தீ விபத்தில், ஸ்ரீஅருணாசலேஸ்வரர் கோயில் எதிரே இருந்த 12 பாத்திரக் கடைகள் எரிந்து சேதமடைந்தன.

ஸ்ரீஅருணாசலேஸ்வரர் கோயில் ராஜகோபுரம் எதிரே கோயிலுக்குச் சொந்தமான இடத்தில் 27 பாத்திரக் கடைகள் உள்ளன. இவற்றின் மேற்கூரை இரும்புத் தகரத்தால் வேயப்பட்டுள்ளன. ஒவ்வொரு கடையும் மரப் பலகைகளால் ஆன தடுப்புகளைக் கொண்டுள்ளது.

ஒவ்வொரு கடையையும் பிரிக்கும் வகையில் செங்கல் சுவர் ஏதும் எழுப்பப்படவில்லை. இக் கடை ஒன்றில் வெள்ளிக்கிழமை நள்ளிரவு 12 மணிக்கு புகை வந்ததை பொதுமக்கள் பார்த்துள்ளனர். பின்னர், இதுகுறித்து திருவண்ணாமலை தீயணைப்பு நிலையத்துக்கு தகவல் தெரிவிக்கப்பட்டது.

விரைந்து வந்த தீயணைப்பு வீரர்கள் தீயை அணைக்கும் முயற்சியில் ஈடுபட்டனர். ஆனால், புகை வந்த கடையின் இரும்பு ஷட்டரை உடைக்க முடியவில்லை. இதேநேரத்தில், அந்தக் கடையில் இருந்து உள்புறமாகவே மற்ற கடைகளுக்கும் தீ பரவியது. ஒவ்வொரு கடையும் மர பலகைகளால் தடுக்கப்பட்டு இருந்ததால் தீ பரவுவதை தீயணைப்பு வீரர்களால் உடனே தடுக்க முடியவில்லை.

தொடர்ந்து மளமளவென எரிந்த தீயைக் கட்டுப்படுத்த போளூர், செங்கம், தண்டராம்பட்டு, வேட்டவலம், கீழ்பென்னாத்தூர் பகுதிகளில் இருந்து 7 தீயணைப்பு வாகனங்கள் வரவழைக்கப்பட்டன. திருவண்ணாமலை மாவட்ட தீயணைப்பு மற்றும் மீட்புப் பணிகள் துறை அலுவலர் வ.ராமசாமி தலைமையில் 45 பேர் கொண்ட தீயணைப்பு வீரர்கள் குழு சுமார் 3 மணி நேரம் போராடி தீயை அணைத்தது.

12 கடைகள் சேதம்:

இவ் விபத்தில் 2 கடைகள் அதிகப்படியான சேதமும், 10 கடைகள் லேசான சேதமும் அடைந்தன. 12 கடைகளின் தடுப்புப் பலகைகள், மர அலமாரிகள், சாமான்களை பேக்கிங் செய்ய பயன்படுத்தப்படும் அட்டைப் பெட்டிகள், மின் வயர்கள், மின்விசிறி உள்ளிட்ட மின்சாதனப் பொருள்கள் எரிந்து சேதமடைந்தன. மேலும், கடைகளில் இருந்த சில்வர் மற்றும் பித்தளை சாமான்களும் புகை படிந்து சேதமடைந்தன.

இவற்றின் தோராய சேத மதிப்பு ரூ.3 லட்சம் இருக்கும். மின் கசிவு காரணமாகவே தீ விபத்து ஏற்பட்டுள்ளது என்று தீயணைப்புத் துறை அதிகாரிகள் தெரிவித்தனர்.

அமைச்சர் ஆறுதல்:

தீ விபத்தில் சேதமடைந்த கடைகளை தமிழக தகவல் தொழில்நுட்பத் துறை அமைச்சர் முக்கூர் என்.சுப்பிரமணியன், வணிகர் சங்கங்களின் பேரவைத் தலைவர் விக்ரமராஜா ஆகியோர் சனிக்கிழமை பார்வையிட்டு, பாதிக்கப்பட்ட கடைக்காரர்களுக்கு ஆறுதல் கூறினர்.

காங்கிரஸ் கட்சியின் சாதனைகளை மக்களிடம் எடுத்துச் செல்ல வேண்டும்: ஜி.கே.வாசன்

காங்கிரஸ் கட்சியின் சாதனைகளை மக்களிடம் எடுத்துச் செல்லும் பணியில் காங்கிரஸ் தொண்டர்கள் ஈடுபட வேண்டும் என கப்பல் போக்குவரத்து துறை அமைச்சர் ஜி.கே.வாசன் வேண்டுகோள் விடுத்துள்ளார்.

இந்திய தேசிய தொழிற்சங்க காங்கிரஸின் (ஐ.என்.டி.யூ.சி.) இணைப்பு சங்கமான துறைமுகங்கள் மற்றும் கப்பல் துறை தொழிலாளர் கூட்டமைப்பின் தேசிய செயற்குழுக் கூட்டம் சென்னையில் சனிக்கிழமை நடைபெற்றது.

இதில் அமைச்சர் ஜி.கே.வாசன் பேசியது, தொழிலாளர்கள் உற்சாகமாக இருக்கும்வரை காங்கிரஸ் கட்சியும் உயிரோட்டமாகவே இருக்கும். தொழிலாளர்கள்தான் இத்தேசத்தின் முதுகெலும்பாக உள்ளனர். வன்முறையில் ஈடுபடாமல் அறப்போராட்டம், அஹிம்சை, சுமுகமான பேச்சுவார்த்தைகள் மூலமாக தொழிலாளர்களின் நலன் காக்கும் இயக்கமாக ஐ.என்.டி.யூ.சி. செயல்பட்டு வருகிறது.

நான் கப்பல் துறை அமைச்சராகப் பதவி வகித்து வரும் கடந்த நான்கரை ஆண்டுகளாக தொழிலாளர்கள் பயன்பெறும் வகையில் பல்வேறு திட்டங்களை அறிவித்துள்ளேன். மேலும் காங்கிரஸ் கட்சி தலைமையிலான ஐக்கிய முற்போக்கு கூட்டணி ஆட்சி பல்வேறு சாதனைகளைச் செய்துள்ளது. இந்த சாதனைகளை பட்டி தொட்டியெங்கும் எடுத்துச்செல்லும் பணியில் காங்கிரஸ் தொண்டர்களும் தொழிலாளர்களும் ஈடுபடவேண்டும்.

இவ்வாறு செய்தால் மத்தியிலும் மாநிலத்திலும் மீண்டும் காங்கிரஸ் ஆட்சி அமையும் என்றார் வாசன்.

திராவிட இயக்கத்துக்கு கேடு விளைவிக்காத கட்சியுடன் கூட்டணி: கருணாநிதி

மக்களவைத் தேர்தலில், திராவிட இயக்கத்துக்கு கேடு விளைவிக்காத கட்சியுடன் கூட்டணி அமைப்போம் என்று திமுக தலைவர் கருணாநிதி கூறினார்.

கருணாநிதியின் சுயசரிதை நூலான "நெஞ்சுக்கு நீதி' 6-ஆம் பாகம் வெளியீóட்டு விழா, சென்னை அண்ணா அறிவாலயத்தில் சனிக்கிழமை நடைபெற்றது.

நீதிபதி பி.ஆர்.கோகுலகிருஷ்ணன் முதல் நூலை வெளியிட, கவிஞர் வைரமுத்து பெற்றுக்கொண்டார். விழாவில் கருணாநிதி பேசியது:

ஞாயிற்றுக்கிழமை (டிச.15) நடைபெறவுள்ள திமுகவின் பொதுக்குழுவில் எந்தக் கட்சியுடன் கூட்டணி அமைப்பது என்பதை சிந்தித்துச் செயலாற்றுவோம். எந்தக் கட்சியுடன் கூட்டணி அமைப்போம்; எந்தக் கட்சியுடன் சேரமாட்டோம் என்பதை கடந்த கால அனுபவத்தில் நியாயமாக சிந்தித்துப் பார்த்து நீங்களே (திமுகவினர்) முடிவு செய்து கொள்ளுங்கள். தற்போது எந்த அணியோடு கூட்டணி அமைப்போம் என்று கேட்காதீர்கள். அது பிணியாகி விடும். ஆனால், நாம் கூட்டணி அமைக்கும் அணி திராவிட இயக்கத்துக்கு கேடு விளைவிக்காத அணியாக இருக்கும் என்பதை மட்டும் கூறுகிறேன்.

அந்த அணியைப் பலப்படுத்த அனைவரும் பாடுபட வேண்டும். பொதுக்குழுவில் நிறைவேற்றப்படும் தீர்மானங்களை விளக்கி, தமிழகம் முழுவதும் மாவட்டந்தோறும் டிச.21-ஆம் தீர்மான விளக்கப் பொதுக்கூட்டங்கள் நடத்த வேண்டும்.

இளைஞர்களுக்கு வேண்டுகோள்: தற்போது உள்ள இளைஞர்கள் இலங்கைத் தமிழர்களுக்கு திமுக என்ன செய்தது என்று கேட்கின்றனர். அவர்கள் எல்லோருக்கும் ஒன்றை மட்டும் சொல்கிறேன். திமுக ஆட்சி இதுவரை 3 முறை கலைப்பட்டது.

ஒவ்வொரு முறை திமுக ஆட்சி கலைக்கப்பட்டபோதும் விடுதலைப் புலிகளுக்கு ஆதரவாகச் செயல்பட்டதாகக் கூறியே கலைக்கப்பட்டது என்பதை இளைஞர்கள் புரிந்துகொள்ள வேண்டும்.

சந்திரசேகர் பிரதமராக இருந்தபோது திமுக ஆட்சியைக் கலைத்தனர். அப்படிக் கலைக்க அவரை யாரெல்லாம் தூண்டினர் என்பதை அனைவரும் புரிந்துகொள்ள வேண்டும் என்றார் கருணாநிதி.

காங்கிரஸýடன் கூட்டணி: திராவிட இயக்கத்துக்கு கேடு விளைவிக்காத கட்சியுடனே அணி அமைப்போம் என்று கூறியதை, காங்கிரûஸத்தான் மறைமுகமாக கருணாநிதி குறிப்பிட்டதாகக் கூட்டத்துக்கு வந்த திமுகவினர் பெரும்பாலானோர் கூறினர். இந்தக் கருத்தை வலியுறுத்தும் வகையில் கவிஞர் வைரமுத்துவின் பேச்சும் அமைந்தது.

திருவாரூரில் உள்ள கமலாலயம் குளத்தில் சிறுவயதில் கருணாநிதியும் அவர் நண்பர் தென்னனும் நீந்தி களித்தனர்.

பாதி தூரத்துக்கு மேல் நீந்த முடியாமல் திரும்பிவிடலாம் என்று தென்னன் கூறினார். ஆனால் திரும்ப வேண்டாம் என்று கூறி எதிர்நீச்சல்போட்டு கருணாநிதி கரை சேர்ந்தார். கமலாலயத்தை அன்றே கருணாநிதி கடந்தவர் என்று அழுத்தம் கொடுத்துப் பேசினார்.

கமலம் என்றால் தாமரை. அது பாஜக சின்னத்தைக் குறிக்கக்கூடியது. பாஜகவின் அலையைக் கருணாநிதி கடப்பார் என்பதேயே வைரமுத்து இவ்வாறு குறிப்பிட்டதாக சொல்லப்படுகிறது.

காங்கிரஸýடன் கூட்டணி என்று கருணாநிதி மறைமுகமாகக் கூறினாலும் தனித்துப் போட்டியிட வேண்டும் என்பதே திமுகவினரின் கருத்தாக உள்ளது.

விழாவுக்கு திமுக பொதுச்செயலாளர் க.அன்பழகன் தலைமை வகித்தார்.

திமுக பொருளாளர் மு.க.ஸ்டாலின், துணைப் பொதுச்செயலாளர் வி.பி.துரைசாமி, நாடாளுமன்றத் திமுக குழுத் தலைவர் டி.ஆர்.பாலு, மாநிலங்களவை திமுக குழு தலைவர் கனிமொழி, காங்கிரஸ் கட்சியின் மூத்த தலைவர் பீட்டர் அல்போன்ஸ், நடிகர் விஜயகுமார், நடிகை குஷ்பு உள்பட திமுக நிர்வாகிகள் பலர் பங்கேற்றனர். துணைப் பொதுச்செயலாளர் துரைமுருகன் வரவேற்றார். திருமகள் பதிப்பக உரிமையாளர் ராமநாதன் நன்றி கூறினார்.

பெங்களூரு விமான நிலையத்துக்கு கெம்பே கெளடா பெயர் சூட்டல்

பெங்களூரு பன்னாட்டு விமான நிலையத்துக்கு பெயர் சூட்டும் விழா சனிக்கிழமை நடைபெற்றது.

பெங்களூரு தேவனஹள்ளியில் சனிக்கிழமை நடைபெற்ற விழாவில், பன்னாட்டு விமான நிலையத்திற்கு பெங்களூரு மாநகரை நிர்மாணித்த கெம்பே கெüடாவின் பெயரைச் சூட்டி  நாட்டுக்கு அர்ப்பணித்தார் கர்நாடக முதல்வர் சித்தராமையா.

விழாவில் பன்னாட்டு விமான நிலையத்தின் புதிய வளாகத்தை திறந்துவைத்து மத்திய விமானத் துறை அமைச்சர் அஜித் சிங் பேசியது:

நகரங்களின் வளர்ச்சியை மேம்படுத்த ரயில், விமான சேவைகளை அதிகரிக்கும் நோக்கில் மத்திய அரசு புதிய கொள்கையை வகுத்து வருகிறது. வளர்ந்த நகரங்களில் குறைந்த செலவில் விமான நிலையங்களை கட்டவும் அரசு ஆலோசித்து வருகிறது. கெம்பே கெüடா பன்னாட்டு விமான நிலையம் மிகவும் அழகாக கட்டி முடிக்கப்பட்டுள்ளது என்றார் அவர்.

மத்திய பெட்ரோலியத் துறை அமைச்சர் வீரப்ப மொய்லி பேசியது:

கெம்பே கெüடா பிறந்த வரலாற்றுச் சிறப்பு வாய்ந்த இடத்தில் அமைந்துள்ள இந்த விமானநிலையத்திற்கு அவரது பெயரை சூட்டியுள்ளது மகிழ்ச்சி அளிக்கிறது. விமான நிலையத்தின் முன் கெம்பே கெüடா சிலையை நிறுவ வேண்டும் என்றார் அவர்.

முதல்வர் சித்தராமையா பேசியது:

பெங்களூரு பன்னாட்டு விமான நிலையத்திற்கு கெம்பே கெüடா பெயரை சூட்டியுள்ளது வரலாற்றுச் சிறப்பு வாய்ந்த நிகழ்வாகும். இந்த நிகழ்வை பொன்னெழுத்தால் எழுத வேண்டும்.

மக்களின் நீண்டகால கனவு இதன்மூலம் நிறைவேறியுள்ளது. இந்த விமான நிலையம் அமைக்க 4,300 ஏக்கர் நிலம் வழங்கிய விவசாயிகளின் தியாகத்தையும் இந்த நேரத்தில் நினைவு கூர வேண்டும்.

விமான நிலையத்தில் உள்ளூர் மக்களுக்கு முன்னுரிமை அடிப்படையில் வேலைவாய்ப்பு அளிக்க வேண்டும்.  விமான நிலையம் முன் கெம்பே கெüடாவுக்கு சிலை அமைக்கப்படும் என்றார் அவர்.

விழாவில் மத்திய சிறுபான்மையினர் நலத் துறை அமைச்சர் ரகுமான்கான், மத்திய விமானத் துறை இணையமைச்சர் கே.சி.வேணுகோபால், கர்நாடக உயர் கல்வித் துறை அமைச்சர் ஆர்.வி.தேஷ்பாண்டே, போக்குவரத்துத் துறை அமைச்சர் ராமலிங்க ரெட்டி, உள் துறை அமைச்சர் கே.ஜே.ஜார்ஜ், வேளாண்மைத் துறை அமைச்சர் கிருஷ்ண பைரேகெüடா, தகவல், உயிரித் தொழில்நுட்பத் துறை அமைச்சர் எஸ்.ஆர்.பாட்டீல் உள்ளிட்டோர் கலந்து கொண்டனர்.

சிக்மகளூரில் டிச.19 முதல் தேசிய கார் பந்தயம்

கர்நாடக மாநிலம், சிக்மகளூரில் வருகிற 19-ஆம் தேதி முதல் காபிடே தேசிய கார் பந்தயம் நடைபெறுகிறது.

இதுகுறித்து பெங்களூருவில் வெள்ளிக்கிழமை காபிடே ஓட்டல்கள், கேளிக்கை விடுதிகள் நிறுவனத்தின் இயக்குநர் வெங்கடேஷ், செய்தியாளர்களிடம் கூறியது:

சிக்மகளூர் மோட்டார் விளையாட்டுச் சங்கத்துடன் இணைந்து காபிடே நிறுவனம் சிக்மகளூரில் வருகிற 19-ஆம் தேதி முதல் தேசிய கார் பந்தயத்தை நடத்துகிறது. இதில் 41 போட்டியாளர்கள் கலந்து கொள்கின்றனர்.

இந்தப் போட்டிக்கு இந்திய மோட்டார் விளையாட்டுச் சங்கக் கூட்டமைப்பு ஆதரவு அளித்துள்ளது. 281.20 கி.மீ. தொலைவை போட்டியாளர்கள் கடக்க வேண்டும். சிக்மகளூரில் உள்ள ஆம்பெர் வேலி ரெசிடென்சியல் பள்ளி வளாகத்தில் மாலை 3 மணியளவில் இந்தப் பந்தயம் தொடங்கும்.

மோட்டார் விளையாட்டுகளில் இந்தியா சிறப்பிடம் பிடிக்க வேண்டும் எனபதே எங்கள் நோக்கம். அதற்காக இளைஞர்களை ஊக்குவிக்கவே இந்தப் போட்டிகள் நடக்கின்றன.  போட்டியை காண 7 ஆயிரம் பேர் கூடுவார்கள் என எதிர்பார்க்கிறோம் என்றார் அவர். பேட்டியின் போது, அதன் சங்கத் துணைத் தலைவர் ஃபரூக் அகமது, வோல்வேகன் மோட்டார் ஸ்போர்ட்ஸ் இந்தியா நிறுவனத் தலைவர் பிரித்விராஜ் சித்தப்பா உள்ளிட்டோர் உடனிருந்தனர்.

தமிழகத்தில் இன்று மழை வாய்ப்பு

தமிழகம் மற்றும் புதுச்சேரியின் சில இடங்களில் இன்று மழையோ அல்லது இடியுடன் மழையோ பெய்ய வாய்ப்புள்ளது என்று சென்னை வானிலை ஆய்வு மையம் தெரிவித்துள்ளது.

வங்கக் கடலில் உருவான மாதி புயல், வலுவிழந்து தமிழகத்தில் கடந்த வியாழக்கிழமை கரையைக் கடந்தது. இது தமிழக நிலப்பரப்பைக் கடந்து, லட்சத் தீவுகளுக்கு அருகில் அரபிக் கடலில் குறைந்த காற்றழுத்த தாழ்வு நிலையாக நிலை கொண்டுள்ளது.

இந்த நிலையில் பருவமழையின் காரணமாக தமிழகம் முழுவதும் ஆங்காங்கே மழை பெய்யும் என்று வானிலை ஆய்வு மைய அதிகாரிகள் தெரிவித்துள்ளனர்.

இந்த நிலையில் சனிக்கிழமை காலை வரையிலான 24 மணி நேரத்தில் குன்னூர், பரமத்தி வேலூரில் 40 மி.மீ. மழையும், கோத்தகிரி, கொடைக்கானலில் 30 மி.மீ. மழையும் பதிவாகியுள்ளது.

நாமக்கல், பெரியகுளம், ராஜபாளையம், ராசிபுரம், கேட்டி (20 மி.மீ.), தம்மம்பட்டி, போடிநாயக்கனூர், பாபநாசம், வாடிப்பட்டி, பெருந்துறை, வாழப்பாடி, திருச்செங்கோடு (10 மி.மீ.) ஆகிய பகுதிகளிலும் மழை பெய்துள்ளது.

அமெரிக்க பள்ளியில் துப்பாக்கிச் சூடு: மர்ம நபர் சாவு

அமெரிக்காவில் பள்ளியில் புகுந்து ஆசிரியரை நோக்கி மர்ம நபர் துப்பாக்கியால் சுட்டதில் 2 மாணவர்கள் காயமடைந்தனர். பின்னர் அந்த நபர் தன்னைத்தானே சுட்டுக்கொண்டு உயிரிழந்தார்.

இது குறித்து போலீஸார் கூறுகையில், ""கொலராடோ மாகாணத்தில் உள்ள அரபாஹு உயர் நிலைப்பள்ளியில் வெள்ளிக்கிழமை இயற்பியல் விஞ்ஞானி நியூட்டன் கொலையான ஆண்டு நினைவு தின நிகழ்ச்சி நடைபெற்றது.

அப்போது, திடீரென அங்கு துப்பாக்கியுடன் வந்த இளைஞரால் இந்தக் கோரச் சம்பவம் நிகழ்ந்தது. ஆசிரியரின் மீதான முன்பகையே இதற்குக் காரணமாக இருக்கலாம் என சந்தேகிக்கிறோம். காயமடைந்தவர்களில் ஒருவர் மாணவி. அவரது நிலைமை கவலைக்கிடமாக உள்ளது. லேசாக காயமடைந்திருந்த மாணவர் சிகிச்சை பெற்று வீடு திரும்பியுள்ளார்.

எனினும், ஆசிரியர் மீதான குறி தவறியதால் அவர் தப்பிவிட்டார்'' என்றார்.

ஈரான்: பிரிட்டனுக்காக உளவு பார்த்தவர் கைது

பிரிட்டன் நாட்டுக்காக, ஈரானை உளவு பார்த்ததாகக் கூறி ஒரு நபரை ஈரான் அதிகாரிகள் கைது செய்துள்ளனர். அவரைப் பற்றிய விபரங்கள் வெளியிடப்படவில்லை.

பல மாதங்களாக கண்காணிக்கப்பட்டு வந்த அவர், தென்கிழக்கு ஈரானிலுள்ள கெர்மன் நகரத்தில் கைது செய்யப்பட்டதாக சனிக்கிழமை அந்நாட்டு ஊடகம் தெரிவித்துள்ளது.

பிரிட்டன் நாட்டு உளவு அமைப்பினர் 4 பேருடன், அந்த நபர் தகவல்களைப் பரிமாறிக்கொண்டதாக தெரிவிக்கப்பட்டுள்ளது.

ஈரான் அவ்வப்போது அயல்நாட்டவர்கள் மீது குற்றம்சாட்டி அவர்களைக் கைது செய்து வருகிறது.

சில மாதங்களுக்கு முன்பு அந்நாட்டின் அணு செறிவூட்டும் பகுதியில் பாராகிளைடிங் முறையில் பறந்த ஸ்லோவாக் நாட்டைச் சேர்ந்த 8 பேரை ஈரான் அதிகாரிகள் கைது செய்து, பின்னர் விடுவித்தது குறிப்பிடத்தக்கது.

இந்திய துணைத் தூதர் கைது இருதரப்பு உறவுகளை பாதிக்காது: அமெரிக்கா நம்பிக்கை

இந்திய துணைத் தூதர் கைது செய்யப்பட்ட விவகாரத்தால் இந்தியாவுடனான உறவில் பாதிப்பு ஏற்படாது என்று அமெரிக்கா நம்பிக்கை தெரிவித்துள்ளது.

1999ஆம் ஆண்டு ஐ.எப்.எஸ். அதிகாரியான தேவயானி கோப்ரகடே, அமெரிக்காவில் இந்திய துணைத் தூதராக பணியாற்றி வருகிறார்.

இந்நிலையில், கடந்த வியாழக்கிழமை தனது குழந்தையை பள்ளியில் விட்டுவிட்டு திரும்பும்போது அமெரிக்க போலீஸார் அவரை கைது செய்து கையில் விலங்கிட்டு அழைத்துச் சென்றனர்.

தனது வீட்டு பணிப்பெண் சங்கீதா ரிச்சர்டுக்கு, நிர்ணயித்த ஊதியத்தை வழங்காமல், கூடுதலாக வேலை வாங்கியதாகவும், அவருக்கு முறைகேடாக விசா பெற்றுத் தந்ததாகவும் தேவயானி கோப்ரகடேவின் மீது மோசடி குற்றச்சாட்டு பதிவாகியுள்ளதாக போலீஸார் தெரிவித்தனர்.

இதற்கிடையே, தேவயானி கோப்ரகடேவை கைது செய்த விதம் இந்தியாவையே அவமதிப்பதாக உள்ளதாக அமெரிக்கத் தூதர் நான்சி பவெலை அழைத்து, இந்திய வெளியுறவுத்துறை செயலர் சுஜாதா சிங் கடும் கண்டனம் தெரிவித்தார். மேலும், அமெரிக்காவின் இந்தச் செயலை ஏற்றுக்கொள்ளவே முடியாது என்றும் இந்தியாவின் கவலையையும் தெரிவித்தார்.

இந்நிலையில், அமெரிக்க வெளியுறவுத்துறை செய்தித்தொடர்பாளர் பி.டி.ஐ. செய்தியாளரிடம் கூறுகையில், ""நாங்கள் இந்தச் சம்பவத்தை சட்ட ரீதியாக கையாண்டு இருக்கிறோம். இந்தியாவுடன் நீண்ட கால உறவைக் கொண்டுள்ள நாங்கள், இத்தகைய உறவு தொடரும் என நம்புகிறோம்.

தூதரக உறவுகள் தொடர்பான வியன்னா தீர்மானத்தின்படி, இந்திய துணைத் தூதருக்கு அமெரிக்க நீதிமன்ற நடவடிக்கைகளில் இருந்து விதிவிலக்கு அளிக்க வேண்டுமெனில், அவை தூதரக பணிகளை நிறைவேற்றுவது தொடர்பான பிரச்னைகளாக இருக்க வேண்டும்'' என்றார்.

இந்த விவகாரம் தொடர்பாக தெற்கு மற்றும் மத்திய ஆசிய நாடுகளுக்கான அமெரிக்க வெளியுறவுத்துறை துணை அமைச்சர் நிஷா தேசாய், அந்நாட்டின் வெளியுறவுத்துறை அமைச்சகம் மற்றும் இந்தியத் தூதரகத்துடன் ஆலோசித்து வருகிறார்.

இது குறித்து வாஷிங்டனில் இந்தியத் தூதரகம் வெளியிட்டுள்ள அறிக்கையில், "தேவயானி கோப்ரகடே நம் நாட்டுக்காக தொடர்ந்து கடமையைச் செய்வதற்கு அவருக்குரிய மரியாதை தரப்பட வேண்டும். இரண்டு குழந்தைகளின் தாயான அவரை,அமெரிக்க அதிகாரிகள் மனிதாபிமான முறையில் நடத்த வேண்டும்' என்று தெரிவிக்கப்பட்டுள்ளது.

மண்டேலா உடல் இன்று அடக்கம்

மறைந்த தென் ஆப்பிரிக்க முன்னாள் அதிபர் நெல்சன் மண்டேலாவின் உடல் அவரது சொந்த ஊரான குனு கிராமத்தில் ஞாயிற்றுக்கிழமை அடக்கம் செய்யப்படுகிறது.

தென் ஆப்பிரிக்காவில் வெள்ளையர்களின் நிற வெறிக்கு எதிராகப் போராடியவர் நெல்சன் மண்டேலா. இதற்காக 27 ஆண்டுகள் தனிமைச் சிறையில் அடைக்கப்பட்டார். இருப்பினும் அவரது இடைவிடாத போராட்டத்தால் அந்நாட்டில் ஜனநாயகம் மலர்ந்தது. இதையடுத்து தென் ஆப்பிரிக்க நாட்டில் முதல் கருப்பின அதிபராக 1994ஆம் ஆண்டு பதவியேற்றார்.

இந்நிலையில், நோய்வாய்ப்பட்டிருந்த அவர், தனது 95ஆவது வயதில் கடந்த 5ஆம் தேதி மரணமடைந்தார். பின்னர், ஜோகன்னஸ்பர்கில் உள்ள எப்.என்.பி மைதானத்தில் கடந்த செவ்வாய்க்கிழமை நினைவஞ்சலிக் கூட்டம் நடைபெற்றது. இதில், இந்திய குடியரசுத் தலைவர் பிரணாப் முகர்ஜி உள்பட உலகம் முழுவதிலும் இருந்து நூற்றுக்கும் மேற்பட்ட தலைவர்கள் கலந்துகொண்டு மண்டேலாவுக்கு இறுதி அஞ்சலி செலுத்தினர்.

சொந்த ஊரில் அடக்கம் செய்வதற்காக மண்டேலாவின் உடல் விமானம் மூலம் எம்தாதாவுக்கு கொண்டு செல்லப்பட்டு அங்கிருந்து ஊர்வலமாக 31 கி.மீ. தொலைவிலுள்ள குனு கிராமத்துக்கு வாகனத்தில் எடுத்துச் செல்லப்பட்டது. வழி நெடுகிலும் அவருக்கு மக்கள் அஞ்சலி செலுத்தினர்.

அமைதிப்படையைச் சேர்ந்த 90 பேர் பலி: ஐ.நா. தகவல்

இந்த ஆண்டில் மட்டும் தனது அமைதிப்படையைச் சேர்ந்த 90 பேர் கொல்லப்பட்டுள்ளதாக ஐ.நா. தெரிவித்துள்ளது.

ஐ.நா. அமைதிப்படையின் தலைவர் ஹெர்வ் லாட்சூஸ், இந்த ஆண்டுக்கான அறிக்கையை செய்தியாளர்களிடம் வெள்ளிக்கிழமை வழங்கி கூறியதாவது:

இந்த ஆண்டில் மட்டும் ஐ.நா. அமைதிப்படையைச் சேர்ந்த 90 பேர் கொல்லப்பட்டுள்ளனர். இவர்களில் 29 பேர் திட்டமிட்ட தாக்குதலில் கொல்லப்பட்டனர். 14 பேர் சூடான் நாட்டின் டார்ஃபர் மாகாணத்தில் கொல்லப்பட்டனர்.

ஐ.நா. பொதுச் செயலாளர் பான் கீ-மூனிடம் சிரியா அரசு வேண்டுகோள் விடுத்தால், அந்த நாட்டில் அமைதியை நிலைநாட்ட எங்களது படை தயாராக உள்ளது.

ஆப்கானிஸ்தான் பாதுகாப்புப் பணியிலிருந்து வெளியேறியுள்ள சில நாட்டு படைகளை, மற்ற அமைதிகாப்புப் பணிகளுக்கு வரவேற்கிறோம் என்றார் லாட்சூஸ்.

வடகொரியாவுக்கு அமெரிக்கா எச்சரிக்கை

வடகொரியாவின் முக்கிய அரசியல் தலைவரான ஜங் சாங் தேக்குக்கு மரணதண்டனை நிறைவேற்றிய அந்நாட்டின் நடவடிக்கைக்கு கண்டனம் தெரிவித்துள்ள அமெரிக்கா, இதுபோன்ற கோபமூட்டும் செயல்களில் இனியும் ஈடுபட வேண்டாம் என்று வடகொரியாவை எச்சரித்துள்ளது.

மேலும், இந்த விவகாரத்தால் அந்த பிராந்தியத்தின் ஸ்திரத்தன்மை குறித்து ஆசிய நட்பு நாடுகளுடன் அமெரிக்கா கலந்தாலோசிக்க உள்ளது.

இதுகுறித்து அமெரிக்க வெளியுறுவுத் துறை செய்தித்தொடர்பாளர் மேரி ஹார்ஃப் வெள்ளிக்கிழமை கூறியதாவது:

வடகொரியாவின் இந்த நடவடிக்கை குறித்து நாங்கள் கவலை கொண்டோம். இது போன்ற கோபமூட்டும் நடவடிக்கைகளில் மேலும் ஈடுபட வேண்டாம் என்று நாங்கள் அந்நாட்டை வலியுறுத்துகிறோம்.

வடகொரியாவின் இத்தகைய கோபமூட்டும் செயல்களுக்கு எதிராக ராணுவக் கண்காணிப்பை அதிகரிக்க தென்கொரியாவின் ராணுவத் தலைமை தளபதி கிம் க்வான் ஜின் உறுதியேற்றுள்ள நிலையில் அமெரிக்கா இவ்வாறு தெரிவித்துள்ளது.

சிங்கப்பூர் கலவரம்: மேலும் இரு இந்தியர்கள் மீது வழக்கு

சிங்கப்பூரின் "லிட்டில் இந்தியா' பகுதியில் நிகழ்ந்த கலவரம் தொடர்பாக மேலும் இரு இந்தியர்கள் மீது வழக்குப் பதிவு செய்யப்பட்டுள்ளது.

இந்திய வர்த்தக நிறுவனங்கள் நிறைந்த "லிட்டில் இந்தியா' பகுதியில் கடந்த ஞாயிற்றுக்கிழமை பேருந்து விபத்து நிகழ்ந்ததில் இந்திய இளைஞர் ஒருவர் உயிரிழந்தார்.

இதையடுத்து தெற்காசிய குடியேற்றத் தொழிலாளர்கள் கலவரத்தில் ஈடுபட்டனர். குதிரை பந்தயச் சாலையில் போஸீஸ் வாகனங்கள் தீக்கிரையாக்கப்பட்டன. போலீஸார் மீது கற்களை வீசி தாக்குதல் நடத்தப்பட்டது.

இச்சம்பவம் தொடர்பாக சனிக்கிழமை மேலும் 2 இந்தியர்கள் மீது போலீஸார் வழக்குப்பதிவு செய்தனர். அதையடுத்து கலவரத்தில் ஈடுபட்டதாக வழக்குப்பதிவு செய்யப்பட்டவர்களின் எண்ணிக்கை 33ஆக உயர்ந்துள்ளது. இவ்வழக்கில் சிக்கியுள்ளவர்கள் மீதான குற்றச்சாட்டு நிரூபிக்கப்பட்டால் அந்நாட்டின் சட்டப்படி 7 ஆண்டுகள் வரை சிறைத் தண்டனை விதிக்க வாய்ப்புள்ளதாகக் கூறப்படுகிறது.

வியத்நாமில் 5 பேருக்கு மரண தண்டனை

வியத்நாமில் போதைப்பொருள் கடத்திய 4 பெண்கள் உள்பட, 5 பேருக்கு அந்த நாட்டு நீதிமன்றம் வெள்ளிக்கிழமை மரண தண்டனை விதித்து தீர்ப்பளித்தது.

""லாவோஸ் நாட்டிலிருந்து வியத்நாமிற்கு 89 கிலோ ஹெராயினை கடத்த முற்பட்ட 6 பேர் அந்நாட்டு போலீஸாரால் கைது செய்யப்பட்டிருந்தனர்.

இந்நிலையில் அவர்கள் என்கே மாகாண நீதிமன்றத்தில் வெள்ளிக்கிழமை ஆஜர்படுத்தப்பட்டனர். வழக்கை விசாரித்த நீதிபதி அவர்களில் 5 பேருக்கு மரண தண்டனையும், ஒருவருக்கு ஆயுள் தண்டனையும் வழங்கி தீர்ப்பளித்தார்'' என்று வியத்நாமிலிருந்து வெளிவரும் "தான் நீன்' பத்திரிகை செய்தி வெளியிட்டுள்ளது.

மரண தண்டனை விதிக்கப்படும் குற்றவாளிகளை, 2011ஆம் ஆண்டு முதல் துப்பாக்கியால் சுட்டுக் கொல்லாமல், மனிதாபிமான அடிப்படையில் விஷ ஊசி போட்டு கொல்வது வழக்கத்தில் இருந்து வருகிறது. தற்போது மரண தண்டனை விதிக்கப்பட்டுள்ள குற்றவாளிகள் பட்டியலில் 700 பேர் உள்ளது குறிப்பிடத்தக்கது.

இந்தியா - பாகிஸ்தான் இணைந்து செயல்பட வேண்டும்: நவாஸ் ஷெரீஃப் சகோதரர் வலியுறுத்தல்

தேச வளர்ச்சிக்காக இந்தியாவும், பாகிஸ்தானும் கருத்து வேறுபாடுகளை மறந்து இணைந்து செயல்பட வேண்டும் என்று, பாகிஸ்தான் பிரதமர் நவாஸ் ஷெரீஃப்பின் சகோதரர் ஷாபாஸ் ஷெரீஃப் வலியுறுத்தியுள்ளார்.

நவாஸ் ஷெரிஃப்பின் சகோதரரும், அந்நாட்டின் பஞ்சாப் மாகாண முதல்வருமான ஷாபாஸ் ஷெரீஃப், இந்தியா வந்துள்ளார். பஞ்சாப் மாநிலம் லூதியானாவில் சனிக்கிழமை அவர், அந்த மாநில முதல்வர் பிரகாஷ் சிங் பாதலை சந்தித்துப் பேசினார். அப்போது அவர் பேசும்போது, இந்தியா - பாகிஸ்தான் வளர்ச்சிக்காக, கடந்த கால சம்பவங்களை இருநாட்டு மக்களும் குழித் தோண்டி புதைத்து விட வேண்டும் என்றும், இருநாட்டின் வளர்ச்சிக்கும் இடையூறாக இருக்கும் முட்டுக்கட்டையை தகர்த்தெறிய வேண்டும் என்றும் கேட்டுக் கொண்டார். முன்பு போரிட்டு கொண்டிருந்த ஐரோப்பிய யூனியன் அமைப்பில் உள்ள நாடுகள், தற்போது வளர்ச்சி என்னும் குறிக்கோளுக்காக கடந்தகால சம்பவங்களை மறந்து விட்டு ஒன்றிணைந்து செயல்பட்டு வருவதாகவும், இதில் இருந்து இருநாடுகளில் உள்ள பஞ்சாப் பகுதியில் வசிக்கும் மக்கள் பாடம் கற்றுக் கொள்ள வேண்டும் என்றும் அவர் தெரிவித்தார்.

பாராட்டு: இந்தியாவின் பஞ்சாப் மாநிலத்தில் உள்ள விவசாயிகளுக்கு அந்த மாநில அரசு இலவசமாக மின்சாரம் வழங்கி வருவதை பாராட்டிய ஷாபாஸ் ஷெரீஃப், இதுபோன்று தம்மால் தனது மாகாணத்தில் வழங்க முடியவில்லை என்று ஏமாற்றம் தெரிவித்தார்.

சந்திரனில் தரையிறங்கியது சீன விண்கலம்

கடந்த 12 நாள்களுக்கு முன்பு சீனா அனுப்பிய "சேங்-இ-3' விண்கலம் சனிக்கிழமை இரவு 9.11 மணியளவில் சந்திரனில் வெற்றிகரமாக தரையிறங்கியது.

இந்த விண்கலம், எவ்வித சேதத்துக்கும் உள்ளாகாமல் மென்மையாகத் தரையிறங்கியது. இது சந்திரனுக்கு விண்வெளி வீரரை அனுப்புவதற்கு முன்னோட்டமாகக் கருதப்படுகிறது. இதன் மூலம் சந்திரனில் நவீனத் தொழில்நுட்பத்துடன் விண்கலத்தை தரையிறக்கிய மூன்றாவது நாடு என்ற பெருமையை சீனா பெற்றுள்ளது.

கடந்த 37 ஆண்டுகளுக்கு முன்பு அமெரிக்காவும், முன்னாள் சோவியத் யூனியன் நாடும் இதேபோல் சந்திரனுக்கு விண்கலத்தை அனுப்பி சேதமில்லாமல் தரையிறக்கியுள்ளன.

"சமமான பகுதியை கண்டறிந்து விண்கலத்துக்கு சேதம் ஏற்படாமல் "சேங்-இ-3' அதன் நான்கு கால்களையும் நீட்டி மெதுவாக தரையிறங்கியது' என்று பெய்ஜிங் விண்வெளி கட்டுப்பாட்டு மையம் தெரிவித்துள்ளது. "சேங்-இ-3' விண்கலம் சந்திரனின் புவி அமைப்பு, இயற்கை வளங்கள் குறித்து ஆய்வு நடத்தவுள்ளது.

2014 ஜூன் 1-ஆம் தேதிக்கு முன்பு புதிய மக்களவை அமைக்கப்படும்

அடுத்த பொதுத்தேர்தல் 2014-ஆம் ஆண்டில் பல்வேறு கட்டங்களாக நடத்தப்பட்டு ஜூன் மாதம் 1-ஆம் தேதிக்கு முன்பு 16-வது மக்களவை அமைக்கப்படும் என்று இந்திய தலைமைத் தேர்தல் ஆணையர் சம்பத் கூறினார்.

அமெரிக்கா சென்றுள்ள சம்பத், அங்குள்ள புரூக்கிங்ஸ் இன்ஸ்டிடியூட் என்ற சிந்தனையாளர் அமைப்பு வெள்ளிக்கிழமை ஏற்பாடு செய்திருந்த நிகழ்ச்சியில் பேசியதாவது:

2014 மக்களவைத் தேர்தலுக்கான முன்னேற்பாடு நடவடிக்கைகளை இந்தியத் தேர்தல் ஆணையம் ஏற்கெனவே தொடங்கி விட்டது. இந்தத் தேர்தலில் 78 கோடி மக்கள் வாக்களிக்க உள்ளனர். இதற்காக 8 லட்சம் வாக்குச்சாவடிகள் அமைக்கப்பட உள்ளன. இந்தத் தேர்தலில் 11.8 லட்சம் வாக்குப்பதிவு இயந்திரங்கள் பயன்படுத்தப்பட உள்ளன.

மார்ச் மாதத்தின் மத்தியில் தேர்தல் தொடங்குகிறது. 16-வது மக்களவைக்கு மொத்தம் 543 உறுப்பினர்கள் தேர்ந்தெடுக்கப்பட உள்ளனர். இந்தியத் தேர்தலைப் பொறுத்தவரை எந்தச் சூழ்நிலையிலும் காலக்கெடுவை தவறவிட்டதில்லை.

இப்போதைய மக்களவையின் பதவிக்காலம் மே மாதம் 31-ஆம் தேதியுடன் நிறைவடைகிறது. அதற்கு முன்பாக தேர்தலை நடத்த வேண்டியது தேர்தல் ஆணையத்தின் கடமையாகும். எத்தனை கட்டமாக தேர்தலை நடத்துவது என்பது இன்னும் முடிவு செய்யப்படவில்லை.

தேர்தல் தொடங்கும் முதல் நாளைக் கணக்கில் கொண்டு, 6 வாரங்களுக்கு முன்னதாக தேர்தல் தேதியை தேர்தல் ஆணையம் அறிவிக்கும். தேர்தல் தேதி அறிவிக்கப்பட்டது முதல், தேர்தல் நடத்தை விதிமுறைகள் அமலுக்கு வரும்.

2014 தேர்தலுக்கான வாக்காளர் பட்டியல் திருத்தம் செய்யும் பணி நடைபெற்று வருகிறது. இன்னும் ஒரு மாத காலத்திற்குள் இந்தியாவின் புதிய வாக்காளர் பட்டியல் வெளியிடப்படும்.

தேர்தல் தேதி நெருங்கும் வரை, விடுபட்ட வாக்காளர்களை சேர்ப்பது, தவறானவற்றை நீக்கம் செய்வது போன்ற பணிகள் தேர்தல் ஆணையத்தால் தொடர்ந்து மேற்கொள்ளப்படும்.

நாட்டின் அனைத்துப் பகுதிகளிலும் தேர்தலுக்கான ஆயத்த நிலையை ஆய்வு செய்யும் பணி விரைவில் தொடங்கும். சட்டம் ஒழுங்கு, தளவாடப் பொருள்கள், வாக்குச்சாவடிகளின் நிலை, பணியாள்கள், உபகரணங்கள் ஆகியவை தொடர்பான ஆய்வுகளும் இதில் அடங்கும்.

தேர்தலுக்கு முன்பாக, அரசியல் கட்சிகள், தேர்தல் அதிகாரிகள் மற்றும் தொடர்புடைய துறைகளுடன் கலந்து ஆலோசித்து தேர்தல் அட்டவணை தயார் செய்யப்படும்.

அப்போது, தட்பவெட்ப நிலை, தேர்வு விவரங்கள், விடுமுறை மற்றும் விசேஷ தினங்கள், அறுவடை நேரங்கள் போன்றவை தொடர்பாகவும் பரிசீலிக்கப்படும்.

நேர்மை, நடுநிலைமை, கட்டுக்கோப்பு இவையே 2014 மக்களவைத் தேர்தலில் முக்கிய குணாதிசயமாக இருக்கும். தேர்தல் ஆணைய அதிகாரிகள் நீண்ட தூரப் பயணம் மேற்கொண்டு பல்வேறு கலந்து ஆலோசனைகளில் ஈடுபடுவார்கள்.

வேட்பாளர்களின் தேர்தல் செலவுகளை குறித்துக் கொள்ள ஒரு தனிப்பிரிவு செயல்படும். வேட்பாளர்கள் பணம் கொடுத்து தங்களுக்குச் சாதகமாக செய்தி வெளியிடச் செய்தால், அந்தச் செலவு சம்பந்தப்பட்ட வேட்பாளரின் கணக்கில் சேர்க்கப்படும். நிர்ணயிக்கப்பட்ட தொகையைவிட கூடுதலாக செலவு செய்யும் வேட்பாளர்கள் தகுதிநீக்கம் செய்யப்படுவார்கள்.

வெளிநாடு வாழ் இந்தியர்கள் இணையதளம் மூலம் வாக்குப்பதிவு செய்வதில் முறைகேடு நடக்க வாய்ப்பு உள்ளதால் தற்போதைக்கு அந்த விஷயத்தில் நாங்கள் மிகவும் எச்சரிக்கையுடன் இருக்கிறோம்.

எப்பொழுதும் கண் பார்வையிலேயே உள்ள மின்னணு வாக்குப்பதிவு இயந்திரங்கள் தொடர்பாக அடிக்கடி புகார் எழும்போது, இணையதள வாக்குப்பதிவை எந்த நம்பிக்கையில் அனுமதிக்க முடியும்?. எனவே, வெளிநாடு வாழ் இந்தியர்கள் தங்களது இருப்பிடங்களில் இருந்தவாறே வாக்களிப்பதற்கு தற்போதைக்கு எந்த ஏற்பாடும் செய்யப்படவில்லை.

வெளிநாடுகளில் வசிப்பவர்கள் வாக்களிக்க விரும்பினால், தேர்தல் சமயத்தில் இந்தியாவுக்கு வந்து வாக்களிக்கட்டும். குறிப்பாக, வாக்களிக்கும் விஷயத்தில் வெளிநாடு வாழ் இந்தியர்களிடம் அதிக ஈடுபாடு இல்லை. பல லட்சக்கணக்கான இந்தியர்கள் வெளிநாடுகளில் வசிக்கின்றபோதும், சில ஆயிரம் பேரே தங்களது வாக்குகளைப் பதிவு செய்கின்றனர் என்று சம்பத் கூறினார்.

"வங்கப்புலி' கங்குலிக்கு வலை விரிக்கும் பாஜக!

இந்திய முன்னாள் கிரிக்கெட் கேப்டன் செளரவ் கங்குலிக்கு பாரதிய ஜனதா கட்சி, அடுத்த மக்களவைத் தேர்தலில் போட்டியிடுவதற்கான டிக்கெட் வழங்க முன்வந்துள்ளதாக செய்தி வெளியாகி உள்ளது. ஆனால், தேர்தலில் போட்டியிடுவது குறித்து கங்குலி இன்னும் முடிவெடுக்கவில்லை.

பாரதிய ஜனதா கட்சியின் பிரதமர் வேட்பாளர் நரேந்திர மோடியிடம் இருந்து கங்குலிக்கு இந்த அழைப்பு வந்ததாகவும், தேர்தலில் தங்கள் கட்சி வெற்றிபெறும் பட்சத்தில் அவரை விளையாட்டு அமைச்சராக நியமிப்பதாக மோடி தரப்பில் உத்தரவாதம் அளிக்கப்பட்டதாகவும் தகவல் வெளியானது.

இதை கங்குலியும் மறுக்கவில்லை. மேற்கு வங்கத்தில் இருந்து வெளியாகும் பத்திரிகை ஒன்றுக்கு அவர் அளித்த பேட்டியில், ""ஆமாம், தேர்தலில் போட்டியிடுவதற்கான அழைப்பு வந்தது. ஆனால், இன்னும் இதுகுறித்து முடிவு செய்யவில்லை. அடுத்த சில நாள்களுக்கு எனக்கு பணிச்சுமை அதிகம் உள்ளது. விரைவில் என் முடிவை அறிவிப்பேன்'' எனத் தெரிவித்துள்ளார்.

நவம்பர் மாதத்தில் கங்குலி தன் நண்பரும், பாஜக தேசிய செயலாளருமான வருண் காந்தியை தில்லியில் சந்தித்துப் பேசினார். வருண் காந்தி மேற்கு வங்க பாஜக அமைப்பாளராக இருப்பது குறிப்பிடத்தக்கது.

இந்த சந்திப்பு நடந்ததில் இருந்து, பாரதிய ஜனதா சார்பில் கங்குலி தேர்தலில் போட்டியிடுவதற்கான அறிவிப்பு வெளியாகும் என எதிர்பார்க்கப்பட்டது.

திரிணாமுல் காங்கிரஸ் ஆட்சி நடைபெறும் மேற்கு வங்கத்தில், டார்ஜிலிங் பகுதியில் பாரதிய ஜனதாவுக்கு செல்வாக்கு அதிகம். எனவே, இதில் ஏதாவது ஒரு தொகுதியில் கங்குலி போட்டியிடலாம் என எதிர்பார்க்கப்படுகிறது.

வென்றாலும் தோற்றாலும் ஒரே மாதிரியான உணர்வை வெளிப்படுத்திக் கொண்டிருந்த இந்திய அணியை ஆக்ரோஷமாகப் போராட வைத்தவர் கங்குலி. கேப்டனாக திறம்பட செயல்பட்ட அவருக்கு மேற்கு வங்கத்தில் ரசிகர்கள் பட்டாளம் அதிகம். இதனால் அவர் வெற்றிபெறுவதிலும் சிரமம் இருக்காது. கங்குலி தேர்தலில் வெற்றிபெற்று விளையாட்டு அமைச்சராகப் பொறுப்பேற்றால், விளையாட்டுத் துறை மேலும் வளர்ச்சிபெறும் என்பது அவரது ரசிகர்களின் எதிர்பார்ப்பு.

ஆட்சியமைக்க கேஜரிவால் நிபந்தனை: தில்லி அரசியலில் புதிய திருப்பம்

தில்லியில் ஆட்சி அமைக்க உரிமை கோருவது குறித்து தங்களது கட்சி முடிவெடுப்பதற்கு முன்பு காங்கிரஸூம் பாஜகவும் தங்களது 18 கேள்விகளுக்கு பதிலளிக்க வேண்டும் என்று ஆம் ஆத்மி திடீர் நிபந்தனை விதித்துள்ளது. இதனால் தில்லி அரசியல் இழுபறிக்குத் தீர்வு காண்பதற்கான வாய்ப்பு சுருங்கியுள்ளதால், அங்கு குடியரசுத் தலைவர் ஆட்சி அமல்படுத்தப்படும் வாய்ப்பு அதிகரித்துள்ளது.

இந்நிலையில் தில்லி அரசியல் நிலவரம் குறித்து குடியரசுத் தலைவர் பிரணாப் முகர்ஜிக்கு தில்லி துணைநிலை ஆளுநர் நஜீப் ஜங் விரிவான அறிக்கை அனுப்பியுள்ளார்.

தில்லி சட்டப்பேரவைத் தேர்தலில் அதிக இடங்களில் வெற்றி பெற்ற கட்சி என்ற அடிப்படையில், பாஜகவை ஆட்சி அமைக்க வருமாறு துணைநிலை ஆளுநர் நஜீப் ஜங் அழைப்பு விடுத்தார். ஆனால், "பெரும்பான்மை பலம் இல்லாததால் எதிர்க்கட்சி வரிசையில் அமரத் தயார்' என அவரிடம் பாஜக முதல்வர் வேட்பாளர் ஹர்ஷ வர்தன் கடந்த வியாழக்கிழமை தெரிவித்தார்.

இதற்கிடையே, ஆம் ஆத்மி ஆட்சி அமைக்க விரும்பினால் அதற்கு நிபந்தனையற்ற ஆதரவு தரத் தயார் என்று தில்லி பிரதேச காங்கிரஸ் தலைவர் ஜே.பி. அகர்வால் துணைநிலை ஆளுநருக்கு வெள்ளிக்கிழமை இரவு கடிதம் அனுப்பினார்.

இதைத் தொடர்ந்து, ஆட்சி அமைப்பது தொடர்பாக ஆலோசிக்க வரும்படி ஆம் ஆத்மி கட்சி தேசிய அமைப்பாளர் அரவிந்த் கேஜரிவாலை நஜீப் ஜங் அழைத்தார். அதன்படி, அவரை சனிக்கிழமை காலை 10.30 மணிக்கு அரவிந்த் கேஜரிவால் சந்தித்துப் பேசினார்.

ஆம் ஆத்மி கட்சியின் தேசிய செயற்குழு உறுப்பினர்கள் மணீஷ் சிசோடியா, குமார் விஸ்வாஸ் ஆகியோர் உடனிருந்தனர்.

ஆதரவை ஏற்க நிபந்தனை:

துணைநிலை ஆளுநரைச் சந்தித்த பின்னர் செய்தியாளர்களிடம் பேசிய அரவிந்த் கேஜரிவால் கூறியதாவது:

"தில்லியில் ஆட்சி அமைக்க கால அவகாசத்தை ஆம் ஆத்மி கட்சி கோரவில்லை. பெரும்பான்மை பலம் கிடைக்கும் என்பது உறுதியானால், மீண்டும் வாய்ப்பு கோருங்கள் என துணைநிலை ஆளுநர் அறிவுறுத்தினார். ஆட்சி அமைக்க ஆம் ஆத்மி மற்ற கட்சிகளிடம் ஆதரவு கேட்கவில்லை. ஆனால், பாஜகவும், காங்கிரஸ் கட்சியும் வலிய வந்து எங்களுக்கு ஆதரவு தருவது ஏன்?

இரு வேறு துருவங்களான அரசியல் கட்சிகள் எவ்விதக் காரணமுமின்றி ஆம் ஆத்மி ஆட்சி அமைய அளிக்கும் நிபந்தனையற்ற ஆதரவில் உள்நோக்கம் இருப்பதாகச் சந்தேகிக்கிறோம். பெரும்பான்மை பலம் இல்லாத கட்சிக்கு ஆம் ஆத்மி ஆதரவு அளிக்காது; பெரும்பான்மை பலம் இல்லாத நிலையில், நாங்களும் ஆதரவு கேட்க மாட்டோம்.

இதற்குப் பிறகும் ஆம் ஆத்மி தலைமையில் ஆட்சி அமைய பாஜகவும், காங்கிரஸýம் விரும்பினால், அதற்கு எங்கள் கோரிக்கைகளை இரு கட்சிகளும் ஏற்க வேண்டும். தில்லியில் விஐபி கலாசாரத்துக்கு முடிவு கட்டுவது, தில்லிக்கு முழுமையான மாநில அந்தஸ்து, மின்சார விநியோக நிறுவனங்களை கணக்குத் தணிக்கையாளரின் தணிக்கைக்கு உள்படுத்துவது, எம்.எல்.ஏ. தொகுதி மேம்பாட்டு நிதித் திட்டத்தை கைவிடுவது, குடிநீர்க் கட்டணத்தை ஆண்டுதோறும் உயர்த்தும் சட்டத்தை ரத்து செய்வது, தில்லியில் வலுவான லோக் ஆயுக்த அமைப்பது உள்ளிட்ட 18 நிபந்தனைகளை காங்கிரஸ் மற்றும் பாஜகவுக்கு விதித்துள்ளோம். முந்தைய காங்கிரஸ் மற்றும் பாஜக ஆட்சியில் நடந்த ஊழல்கள் குறித்தும் சுட்டிக்காட்டியுள்ளோம்.

எங்கள் கோரிக்கைகள் குறித்து காங்கிரஸ் தலைவர் சோனியா காந்திக்கும் பாஜக தலைவர் ராஜ்நாத் சிங்குக்கும் நான் கடிதம் எழுதியுள்ளேன்.

அக் கோரிக்கைகளை இரு கட்சிகளும் முழுமையாக ஏற்றுக் கொள்வதாக அறிவித்தால், பொது மக்கள் கருத்தைக் கேட்டு ஆட்சி அமைப்பது குறித்து பரிசீலிப்போம்' என்றார் அரவிந்த் கேஜரிவால்.

துணைநிலை ஆளுநர் நஜீப் ஜங்கைச் சந்தித்தபோது, காங்கிரஸ் மற்றும் பாஜகவுக்கு அனுப்பிய 18 நிபந்தனைகள் அடங்கிய கடிதங்களின் நகல்களை அரவிந்த் கேஜரிவால் அளித்தார்.

ஆம் ஆத்மி கட்சியின் இந்த நிலைப்பாட்டால் தில்லியில் புதிய அரசு அமைவதில் இழுபறி நீடிக்கிறது. இதனால் தில்லியில் குடியரசுத் தலைவர் ஆட்சியை அமல்படுத்துவதற்கான வாய்ப்பு அதிகரித்துள்ளது.

துணைநிலை ஆளுநர் அறிக்கை

தில்லியில் தேர்தல் முடிவுகள் வெளியாகி ஒரு வாரம் ஆகியும், புதிய ஆட்சி அமைவதில் சிக்கல் நீடிக்கிறது. தனிப்பெரும் கட்சியான பாஜக ஆட்சி அமைப்பதில் தயக்கம் காட்ட, அடுத்த இடத்தை வகிக்கும் ஆம் ஆத்மியோ நிபந்தனைகளை விதித்து விறைப்பு காட்டுகிறது.

இந்நிலையில், தில்லியின் தற்போதைய அரசியல் நிலவரம் குறித்து குடியரசுத் தலைவர் பிரணாப் முகர்ஜிக்கு, தில்லி துணைநிலை ஆளுநர் நஜீப் ஜங் சனிக்கிழமை விரிவான அறிக்கையை அனுப்பியுள்ளார்.

அதில் ஆட்சி அமைக்க அழைத்தும் பாஜக மறுத்திருப்பது மற்றும் ஆட்சி அமைப்பதற்கு நிபந்தனைகளை விதித்துள்ள ஆம் ஆத்மி கட்சியின் நிலைப்பாடு குறித்து நஜீப் ஜங் எடுத்துரைத்திருப்பதாகத் தகவல்கள் தெரிவிக்கின்றன. மேலும் இந்த அறிக்கையின் நகலை மத்திய உள்துறை அமைச்சகத்துக்கும் நஜீப் ஜங் அனுப்பியிருப்பதாகவும், இந்தப் பிரச்னையில் குடியரசுத் தலைவர் ஆட்சியை அமல்படுத்துவது குறித்த உத்தரவுக்காக அவர் காத்திருப்பதாகவும் தகவல்கள் கூறுகின்றன.

காங்கிரஸ் தலைமையிலான அரசு நடைபெற்ற தில்லியில் சட்டப்பேரவையின் ஆயுள் காலம் வரும் செவ்வாய்க்கிழமை (டிசம்பர் 17) முடிவடைவது குறிப்பிடத் தக்கது.