ஏப்ரலில் வெளியாகுமா விஸ்வரூபம் 2?

கமல்ஹாஸனின் விஸ்வரூபம் 2 படத்தின் ரிலீஸ் தேதி ஏப்ரல் மாதத்துக்கு தள்ளிப் போய்விட்டது.

உலக நாயகன் கமல்ஹாசன் நடித்து இயக்கும் படம் விஸ்வரூபம் 2. இந்த ஆண்டு தொடக்கத்தில் பல பிரச்சனைகளையும் தடைகளையும் கடந்து வெளியான விஸ்வரூபம் மாபெரும் வெற்றிபெற்றது. இப்போது அந்தப் படத்தின் இரண்டாம் பாகம் தயாராகிக்கொண்டிருக்கிறது.

விஸ்வரூபம் முதல் பாகத்தில் இடம்பெற்ற நடிகர், நடிகைகள் மட்டுமன்றி, இரண்டாம் பாகத்தில் வேறு சில நடிகர், நடிகைகளும் நடித்துள்ளனர். பூஜா குமார் மற்றும் ஆன்ட்ரியா நாயகிகளாக நடித்துள்ளனர்.‘விஸ்வரூபம் 2′ படத்தினை கமல் தயாரிக்கவில்லை, ஆஸ்கர் பிலிம்ஸ் தயாரித்து வருகிறது. ‘விஸ்வரூபம்’ படம் வெளியாகும் போதே தமிழ்நாட்டில் பல்வேறு இடங்களுக்கு விநியோகம் செய்தவர் ரவிச்சந்திரன். இரண்டாம் பாகத்தினை பிரம்மாண்டமாக தயாரிக்கிறார்.

அதுமட்டுமன்றி கமலும், முதல் பாகம் போன்று எந்த ஒரு சர்ச்சையிலும் இரண்டாம் பாகம் சிக்கி விடக்கூடாது என்பதால் அதற்கேற்ப திட்டமிட்டு வெளியிடுகிறார்களாம். இஸ்லாமிய அமைப்புகளிடம் ஏற்கெனவே இது பற்றிப் பேசியிருக்கிறார்கள். ‘விஸ்வரூபம்’ ஆரோ 3டி தொழில்நுட்பத்தில் சில தியேட்டர்களில் மட்டும்தான் வெளியிடப்பட்டது, ‘விஸ்வரூபம்2′ அனைத்து தியேட்டர்களிலும் ஆரோ 3டி தொழில்நுட்பத்தில் வெளியிட, கமல் முயற்சித்து வருகிறார்.

படம் இந்த ஆண்டே வெளிவரும் என்றுதான் அறிவித்திருந்தார் கமல். முதலில் இப்படம் பொங்கலுக்கு வெளியாக இருந்தது. பின்னர் படத்தின் ரிலீஸ் தேதி ஜனவரி 26-ம் தேதிக்கு மாற்றப்பட்டது. இந்நிலையில் ஜனவரி 26-ம் வெளியாகும் என எதிர்பார்க்கப்பட்ட நிலையில் பிப்ரவரி 14-ம் தேதிக்கு தள்ளி வைக்கப்பட்டதாக கூறப்பட்டது. ஆனால் இப்போது விஷ்வரூபம்-2 படம் வருகிற 2014 ஆம் ஆண்டு ஏப்ரல் மாதம் வெளியாகலாம் என்று கோலிவுட்டில் பரவலாகப் பேசப்பட்டு வருகிறது. படத்தின் டிரைலரை பிப்ரவரியிலும், படத்தை ஏப்ரலிலும்ஏப்ரலில் வெளியிட திட்டமிட்டு இருக்கிறார் கமல்.