சித்தராமையாவை முதல்வர் பதவியில் இருந்து நீக்க சதி திட்டமா?

சித்தராமையாவை முதல்வர் பதவியில் இருந்து நீக்க சதி திட்டப்படுகிறதா என்பது எனக்கு தெரியாது என்று காங்கிரஸ் மாநிலத்தலைவர் ஜி.பரமேஸ்வர் தெரிவித்தார்.

இது குறித்துபெங்களூருவில் வெள்ளிக்கிழமை செய்தியாளர்களிடம் அவர் கூறியது: முதல்வர் பதவியில் இருந்து சித்தராமையாவை நீக்குவதற்கு சதி திட்டம் தீட்டப்படுகிறதா என்பது குறித்து எனது கவனத்திற்கு எதுவும் வரவில்லை. எனவே, அது குறித்துஎனக்கு தெரியாது.

சித்தராமையா தலைமையிலான காங்கிரஸ் அரசுக்கு எவ்வித தொந்தரவும் இல்லை. அரசும் நல்லாட்சி நடத்திவருகிறது. மக்களுக்கு அளித்தவாக்குறுதிகளை நிறைவேற்றிவருகிறது. மேலும் பல வாக்குறுதிகளை நிறைவேற்றும் நோக்கில் அரசு செயல்பட்டுவருகிறது. எனவே, முதல்வர் சித்தராமையாவுக்கு எதிராக யாரும் பேசக்கூடாது.

எடியூரப்பா, பாஜகவில் மீண்டும் சேருவதற்கும் எங்களுக்கும் சம்பந்தமில்லை. பாஜகவில் எடியூரப்பா சேருவதால், காங்கிரஸ் கட்சிக்கு எவ்வித பாதிப்பும் ஏற்படப்போவதில்லை. வாரியம் மற்றும் கழகங்களுக்கு தலைவர்கள் நியமிப்பது குறித்துவிரைவில் முடிவெடுப்போம் என்றார் அவர்.