தேவஸ்தானம் வெளியிட்ட ஏழுமலையான் தரிசன விவரங்கள்

புத்தாண்டை முன்னிட்டு, திருமலை ஏழுமலையானின் தரிசன விவரங்களை தேவஸ்தான செயல் இணை அதிகாரி சீனிவாசராஜு தெரிவித்தார்.

ஜனவரி 1 புத்தாண்டு தினம், 11 வைகுண்ட ஏகாதசி மற்றும் 12 துவாதசி தினத்தன்று, ஏழுமலையானை தரிசிக்கும் வழிமுறைகளை, தேவஸ்தானம் செவ்வாய்க்கிழமை தெரிவித்தது: திருமலையில், ஜனவரி 1 மற்றும் 11-ஆம் தேதி, விஐபிகள் நள்ளிரவு 1 மணிக்கு பின்பே, தரிசனத்துக்கு அனுமதிக்கப்படுவர்.

தரிசனத்துக்கும், தங்கும் அறைகள் பெறவும், அடையாள அட்டை கட்டாயம் தேவை. விஐபி ஒருவருடன், 6 பேர் மட்டுமே தரிசனத்துக்கு, அனுமதிக்கப்படுவர்.

மேற்கண்ட 3 தினங்களிலும், தரிசனத்துக்கும், வாடகை அறைகள் பெறவும், விஐபிக்களின் பரிந்துரை கடிதங்கள், ஏற்கப்பட மாட்டாது. ஒருவருக்கு, ரூ.1000 செலுத்தி வி.ஐ.பி.க்கள், தரிசன டிக்கெட்டை பெற வேண்டும். அதே போல், தங்கும் அறைகளின் முன்பதிவும், நன்கொடையாளர்களுக்கு மட்டும், ஒருவருக்கு 1 அறை என, 5 நாள்களுக்கு முன் வழங்கப்படும்.

தர்ம தரிசன பக்தர்கள், மாலை 5 மணிக்கு பின்னரே, டிசம்பர் 31-ஆம் தேதி மற்றும் ஜனவரி 1-ஆம் தேதி, எம்.பி.சி. 26 அருகில் உள்ள க்யூ வரிசையில், மறுநாள் தரிசனத்துக்காக, அனுமதிக்கப்படுவர்.

ஜனவரி 1-ஆம் தேதி, 20 ஆயிரம் பக்தர்களுக்கும், ஜனவரி 11-ஆம் தேதி 22 ஆயிரம் பக்தர்களுக்கும், ஏழுமலையானின் தரிசனம் வழங்கப்படும். திருப்பதி அலிபிரியிலிருந்து, பாதயாத்திரையாக வரும் பக்தர்கள், டிச.31 நள்ளிரவுக்கு பின்னும், வைகுண்ட ஏகாதசி அன்று மதியம் 2 மணிக்கும், நாராயணகிரி நந்தவனத்தில் உள்ள க்யூ வரிசையில், தரிசனத்துக்காக அனுமதிக்கப்படுவர். மேலும், ஸ்ரீவாரிமெட்டு மார்க்கத்தில், பாதயாத்திரையாக வரும் பக்தர்கள், இந்த 2 நாள்களும் காலை 6 மணிக்கே, க்யூ வரிசையில் அனுமதிக்கப்படுவர்.

பாதயாத்திரையாக வரும் பக்தர்கள், ஜனவரி 1-ஆம் தேதி 25 ஆயிரம் பேருக்கும், ஜனவரி 11-ஆம் தேதி 30 ஆயிரம் பேருக்கும், ஏழுமலையான் தரிசனம் அளிக்கப்படும்.

ஜனவரி 1-ஆம் தேதி தரிசனத்துக்காக, 4,800 ரூ.50 டிக்கெட்டுகள் முன்பதிவு மூலம் ஏற்கெனவே வழங்கப்பட்டு விட்டது.

ஜனவரி 11-ஆம் தேதி ரூ. 50 சுதர்சன டிக்கெட் ரத்து செய்யப்பட்டுள்ளது. ரூ.300 விரைவு தரிசனம், இந்த 2 நாள்களும் ரத்து செய்யப்பட்டுள்ளது.

ஜனவரி 12-ஆம் தேதி ரூ.300 தரிசனத்திற்காக, 5ஆயிரம் டிக்கெட்டுகள் மட்டும் வழங்கப்படும். வயோதிகர்கள், மாற்றுத்திறனாளிகள், கைக்குழந்தையின் பெற்றோர் தரிசனங்களும், ஆர்ஜித சேவைகளும் இந்த 3 நாள்களும் ரத்து செய்யப்பட்டுள்ளது.

அனைத்து பக்தர்களும், ஏழுமலையானை தரிசனம் செய்ய வேண்டும், என்ற நோக்கத்தில், இந்த வசதிகள் செய்யப்பட்டுள்ளன.

எனவே, அனைவரும் தேவஸ்தானத்துக்கு ஒத்துழைப்பு அளித்து, ஏழுமலையானை மனம் குளிர, தரிசிக்க வேண்டும் என அவர் பக்தர்களை கேட்டுக் கொண்டார்.